Fyrstu skóflustungurnar að nýjum leikfleti
Fyrstu skóflustungurnar að nýjum leikfleti á Laugardalsvelli voru teknar í dag, fimmtudag. Þorvaldur Örlygsson formaður KSÍ, Ásmundur Einar Daðason ráðherra íþróttamála og Einar Þorsteinsson borgarstjóri Reykjavíkur tóku allir eina stungu. Í kjölfarið var þökuskurðarvélin sett í gang og þar með formlega hafinn fyrsti kafli í uppbyggingu og endurnýjun þjóðarleikvangsins Laugardalsvallar.
Fréttatilkynning:
Framkvæmdir hafnar á Laugardalsvelli
Ásmundur Einar Daðason, mennta- og barnamálaráðherra, Einar Þorsteinsson borgarstjóri og Þorvaldur Örlygsson formaður KSÍ tóku fyrstu skóflustungurnar á Laugardalsvelli í dag. Þar með er fyrsti áfangi í uppbyggingu leikvangsins hafinn. Grasi Laugardalsvallar verður skipt út fyrir blendigrasi (svokallað hybrid-gras) og hitunarkerfi verður sett undir völlinn.
Markmiðið er að gera Laugardalsvöll leikfæran mun stærri hluta ársins en nú er. Áfanganum verður lokið fyrir landsleiki í knattspyrnu næsta sumar. Laugardalsvöllur verður byggður upp sem knattspyrnuvöllur eingöngu, og mun nýr þjóðarleikvangur í frjálsíþróttum rísa á nýjum stað í Laugardal.
Forsætisráðherra, mennta- og barnamálaráðherra, fjármála- og efnahagsráðherra, Reykjavíkurborg, Knattspyrnusamband Íslands og Frjálsíþróttasamband Íslands undirrituðu viljayfirlýsingu þess efnis í byrjun september.
Ríki og borg leggja hvor um sig allt að 250 milljónir króna í framkvæmd fyrsta áfanga og annast Knattspyrnusamband Íslands verkið.
Framkvæmdin markar fyrsta skref í uppbyggingu Laugardalsvallar sem framtíðarþjóðarleikvangs í knattspyrnu. Með uppbyggingunni vilja stjórnvöld styðja við sívaxandi afrek og árangur sem kallar á bætta aðstöðu, aðstöðu sem uppfyllir kröfur alþjóðlegra íþróttasambanda til alþjóðlegrar keppni.
Mennta- og barnamálaráðuneytið
Reykjavíkurborg
Knattspyrnusamband Íslands
.png?proc=760)
