England á Wembley á föstudag
A landslið karla er um þessar mundir við æfingar á æfingasvæði QPR í Lundúnum til undirbúnings fyrir vináttuleikinn við England á Wembley á föstudag.
Åge Hareide, þjálfari íslenska liðsins, hefur þurft að gera breytingu á hópnum frá því hann var gefinn út. Willum Þór Willumsson og Orri Steinn Óskarsson eru meiddir og geta ekki verið með í leikjunum, og hefur Sævar Atli Magnússon verið kallaður í hópinn, sem telur nú 23 leikmenn.
Uppfært 05.06: Hlynur Freyr Karlsson og Mikael Egill Ellertsson eru meiddir og verða ekki með, í þeirra stað koma Valgeir Lunddal Friðriksson og Logi Tómasson.
Leikurinn á föstudag, og raunar báðir vináttuleikir A landsliðs karla í mánuðinum, eru í beinni útsendingu og opinni dagskrá Stöðvar 2 sports. Íslenska liðið mætir sem fyrr segir Englandi á föstudag, og síðan Hollandi í Rotterdam á mánudag.
