Tveggja marka sigur gegn Hondúras
A landslið karla vann í kvöld tveggja marka sigur á Hondúras í seinni vináttuleik sínum í janúarverkefni liðsins í Florida, og fylgdi þannig eftir eins mark sigri á Gvatemala í fyrri leiknum.
Eftir markalausan fyrri hálfleik dró til tíðinda snemma í þeim seinni þegar íslenska liðið fékk vítaspyrnu á 48. mínútu og úr henni skoraði Andri Lucas Guðjohnsen sitt sjötta A-landsliðsmark í 20 leikjum. Það var síðan Brynjólfur Andersen Willumsson sem skoraði seinna markið af miklu harðfylgi á 58. mínútu, hans fyrsta mark fyrir A-landsliðið, en Brynjólfur lék einmitt sína fyrstu tvo A-landsleiki í þessu janúarverkefni.
Tveir góðir sigrar, þrjú mörk og ekkert fengið á sig er flott uppskera. Næsta verkefni A landsliðs karla er umspilsleikur við Ísrael í mars. Sigurvegarinn úr þeim leik mætir annað hvort Úkraínu eða Bosníu-Hersegóvínu í úrslita-umspilsleik um sæti í lokakeppni EM 2024.
A landslið karla
Mynd: Jónína Guðbjörg (jggsport)
