Breytingar á starfsliði A landsliðs karla fyrir júníleikina
Framundan eru tveir heimaleikir A landsliðs karla í undankeppni EM 2024 – gegn Slóvakíu þjóðhátíðardaginn 17. júní og síðan gegn Portúgal 20. júní. Þetta verða fyrstu tveir leikir liðsins undir stjórn norska þjálfarans Åge Hareide, sem var tilkynntur sem nýr þjálfari íslenska liðsins um miðjan apríl síðastliðinn.
Með nýjum þjálfara koma gjarnan breytingar á starfsliði og þá jafnan helst á teymi þjálfara og leikgreinenda, og svo er einnig nú. Jóhannes Karl Guðjónsson er áfram aðstoðarþjálfari og Arnór Snær Guðmundsson þrekþjálfari. Fjalar Þorgeirsson kemur inn sem markvarðaþjálfari og Markús Árni Vernharðsson kemur inn í teymi leikgreinanda. Hinn sænski Jörgen Lennartsson kemur einnig inn í teymið og aðstoðar við leikgreiningu, og mun hann leikgreina andstæðinga íslenska liðsins. Hinn 58 ára gamli Jörgen Lennartsson er afar reyndur og hefur starfað með félagsliðum og landsliðum á Norðurlöndunum, sem aðalþjálfari stórra félagsliða í Svíþjóð og Noregi, sem þjálfari U21 landsliðs Svíþjóðar, og sem leikgreinandi fyrir danska landsliðið á HM í Rússlandi, svo eitthvað sé nefnt.
Eins og fyrr segir eru báðir leikirnir heimaleikir og fara auðvitað báðir fram á Laugardalsvelli. Sala aðgöngumiða á leikinn við Slóvakíu er í fullum gangi og eru um 3 þúsund miðar óseldir þegar þetta er ritað, en uppselt er á leikinn við Portúgal. Mótsmiðasölu, þar sem hægt var að kaupa miða á alla heimaleiki íslenska liðsins í undankeppninni, lauk um miðjan maí og þar seldust hátt í 2 þúsund mótsmiðar.
.jpg?proc=760)
