Leikið gegn Úganda og Suður-Kóreu í janúar
KSÍ getur staðfest að A landslið karla muni leika tvo vináttuleiki í Antalya í Tyrklandi í janúar. Sem fyrr eru janúarverkefni liðsins utan hins alþjóðlega leikjadagatals FIFA, sem þýðir að íslenska liðið verður að mestu skipað leikmönnum sem spila með félagsliðum í Skandinavíu og á Íslandi. Mótherjarnir að þessu sinni verða annars vegar Úganda 12. janúar og Suður-Kórea 15. janúar. Ísland hefur aldrei áður mætt þessum tveimur þjóðum í A landsleik karla.
Suður-Kórea er auðvitað knattspyrnuþjóð sem er knattspyrnuáhugafólki að góðu kunn og þaðan hafa margir afbragðs leikmenn komið, sem hafa m.a. leikið í sterkustu deildum Evrópu, enda hefur landslið Suður-Kóreu 10 sinnum komist í lokakeppni HM og er sem stendur í 33. sæti styrkleikalista FIFA. Úganda eru hins vegar í 82. sæti heimslistans, en liðið hefur aldrei komist í lokakeppni HM. Nokkrir fyrrverandi landsliðsmenn frá Úganda hafa leikið á Íslandi, Andrew Mwesigwa lék með ÍBV og Tonny Mawejje lék með ÍBV, Val og Þrótti.
