A karla mætir Rúmeníu á fimmtudag
A landslið karla mætir Rúmeníu í undankeppni HM 2022 í Búkarest á fimmtudag. Leikurinn hefst kl. 19:45 að íslenskum tíma (21:45 að staðartíma) og verður í beinni útsendingu á RÚV. Um er að ræða næst síðustu umferðina í undankeppni HM. Þjóðverjar hafa þegar tryggt sér efsta sætið og þar með sæti í úrslitakeppni HM í Katar, en baráttan um umspilssætið er á milli Rúmeníu, Norður-Makedóníu, Armeníu og Íslands, sem á enn möguleika. Íslenska liðið þarf sigur í báðum sínum leikjum, gegn Rúmeníu og svo gegn Norður-Makedóníu, og þarf auk þess að treysta á hagstæð úrslit úr öðrum leikjum.
Ísland og Rúmenía hafa mæst fjórum sinnum í A landsliðum karla. Rúmenar hafa unnið þrjá leiki og Íslendingar einn og sá sigur kom í undanúrslitaleik umspils um sæti í úrslitakeppni EM síðasta haust, en sem kunnugt er tapaði íslenska liðið síðan fyrir Ungverjum í úrslitaleik um EM-sæti á lokamínútunum.
Rúmenar unnu fyrri viðureign liðanna í þeirri undankeppni sem nú stendur yfir, tveggja marka sigur á Laugardalsvelli í september. Hinar tvær viðureignir liðanna voru í undankeppni HM 1998 og þá unnu Rúmenar báða leikina með fjórum mörkum gegn engu. Rúmenska liðið komst í 16-liða úrslit í Heimsmeistarakeppninni í Frakklandi 1998 með fyrirliðann Gheorghe Hagi í fararbroddi.
