Ísland mætir Belgíu í Brussel
A landslið karla mætir Belgíu í A-deild Þjóðadeildar UEFA á Koning Boudewijn leikvanginum í Brussel á þriðjudag. Leikurinn hefst kl. 18:45 að íslenskum tíma og er í beinni útsendingu á Stöð 2 sport, en á sama tíma taka Danir á móti Englendingum. Um er að ræða aðra umferð leikja í keppninni, en fyrsta umferðin í riðli Íslands fór fram síðastliðinn laugardag. Sem kunnugt er beið Ísland þá lægri hlut gegn Englandi á Laugardalsvellinum eftir dramatískar lokamínútur, en Belgía lagði Danmörku á Parken í Kaupmannahöfn.
Sagan er ekki hliðholl Íslendingum í viðureignum A landsliða karla í gegnum tíðina. Liðin hafa mæst 11 sinnum og ávallt hafa Belgar haft sigur. Ísland hefur skorað 6 mörk, en Belgar 37. Þessi tvö lið voru einmitt saman í riðli í A-deild Þjóðadeildarinnar 2018, en Belgar unnu þá 2-0 sigur í Brussel og 3-0 í Reykjavík.
