Félagaskiptaglugginn lokar 30. júní
Mynd - fotbolti.net - Hafliði Breiðfjörð
Athygli félaga er vakin á því að félagaskiptaglugginn lokar á miðnætti á morgun, þriðjudag, 30. júní.
Glugginn er lokaður fyrir alla leikmenn nema ósamningsbundna leikmenn yngri flokka. Þeir geta skipt til og með 1. september nk. að öðrum skilyrðum uppfylltum.
Glugginn opnar svo aftur, að þessu sinni, 5. ágúst nk. og er opinn til 1. september.
Sérstök athygli er vakin á því að ef félög ætla að fá leikmenn erlendis frá þá þurfa þau að vera tímanlega á ferðinni og eru félög eindregið hvött til að senda inn beiðnir um slíkt á skrifstofutíma. Búast má við því að félagaskipti á milli landa taki nokkra daga. Þá er minnt á að ef leikmenn eru frá öðrum löndum en innan EES, Grænlandi og Færeyjum skal samhliða félagaskiptum fylgja staðfesting frá Útlendingastofnun og/eða Vinnumálastofnun á dvalar- og atvinnuleyfi leikmannsins á Íslandi.
Vert er að minna á grein 15.4 í reglugerðinni er snýr að félagaskiptum. Hún hljóðar svona:
15.4. Almennt skal gilda, að leikmaður fær keppnisleyfi frá og með tilteknum degi hafi fullfrágengin tilkynning um félagaskiptin borist til skrifstofu KSÍ fyrir miðnætti daginn áður, en þó verður tilkynning sem berst um helgi eða á frídegi að öllu jöfnu afgreidd næsta virka dag á eftir og keppnisleyfi gefið út frá og með þeim degi. Berist tilkynning um félagaskipti undirrituð af leikmanni og félagi sem gengið er í, fyrir miðnætti á lokadegi félagaskiptatímabils skal íslensku félagi sem gengið er úr gefinn einn virkur dagur til að ganga frá félagaskiptunum með undirritun. Keppnisleyfi með nýju félagi getur því tekið gildi í slíkum tilfellum nokkrum dögum eftir að félagaskiptatímabili lýkur en við útgáfu slíks keppnisleyfis ber að gæta þess að a.m.k. tveir dagar líði á milli leikja hjá leikmanninum. Þegar félagið sem gengið er úr er erlent skulu reglur FIFA gilda og getur keppnisleyfi verið gefið út allt að 7 dögum frá lokadegi félagaskiptatímabils.
Loks er minnt á póstfang vegna félagaskipta: felagaskipti@ksi.is
.jpg?proc=760)
