Aprílgabb: Gervigras á nýjan Laugardalsvöll
Í liðinni viku funduðu fulltrúar KSÍ, UEFA og FIFA með fulltrúum Reykjavíkurborgar og menntamálaráðuneytis um framtíð Laugardalsvallar sem þjóðarleikvangs í knattspyrnu. Aðilar eru allir sammála um að komast verði að niðurstöðu sem allra fyrst og vinna að úrbótum á aðstöðu allra þeirra sem sækja leiki og þjónustu á vellinum. Búist er við lokaniðurstöðu um framhaldið á næstu mánuðum.
Á fundinum var tekin ákvörðun um að skipta um undirlag á leikfleti Laugardalsvallar fyrir næstu landsleiki sem fram fara á vellinum, en það eru tveir leikir A landsliðs karla í undankeppni EM 2020 – gegn Albaníu og Tyrklandi. Fallist var á tillögu fulltrúa Reykjavíkurborgar um að leikflötur Laugardalsvallar verði gervigras. Er þá sérstaklega horft til tónleikahalds á vellinum, en eins og kunnugt er mun tónlistarmaðurinn Ed Sheeran koma fram þar í ágúst og standa nú þegar yfir samningaviðræður við tvo aðra heimsfræga listamenn. Hafist verður handa við að fjarlægja núverandi gras af leikfleti Laugardalsvallar strax í dag og er áhugasömum gefinn kostur á að skera sér „torfu“ til minningar um grasflötinn. Einnig er hægt að senda póst á ksi@ksi.is til að tryggja sér sneið.
Fjármögnun á lagningu gervigrassins kemur að öllu leyti með fjármagni frá Hat Trick sjóði UEFA.
.png?proc=760)
