Breytingar á reglugerð - Viðræður við leikmenn
Rétt er að minna á að í dag, 16. október, tóku gildi breytingar á reglugerð KSÍ um félagaskipti, samninga og stöðu leikmanna og félaga og varða hvenær megi hefja viðræður við leikmenn. Sjá frétt frá 2. ágúst sl.
Breytingar þessar byggja á niðurstöðum vinnuhóps um félagaskipti og samninga en skipan vinnuhópsins byggir á ályktunartillögum sem lagðar voru fyrir 70. ársþing KSÍ þann 13. febrúar 2016. Um er ræða breytingar sem félög og forráðamenn eru hvött til að kynna sér gaumgæfilega.
Frá og með deginum í dag er félagi heimilt að eiga í samningaviðræðum og skrifa undir samning við leikmann í öðru félagi eftir að sex mánuðir eru til loka samningstíma leikmannsins við sitt núverandi félag. Þó skal hafa það í huga að félag sem hyggst hefja samningaviðræður við leikmann, eftir að sex mánuðir eru til loka samningstíma hans við sitt núverandi félag, skal þá þegar tilkynna stjórn þess félags, um það skriflega og með sannanlegum hætti áður en samningaviðræður hefjast við leikmanninn.
Sama á við þegar leikmaður hyggst hefja samningaviðræður við annað félag, en þá ber leikmanni að tilkynna stjórn núverandi félags áður en þær viðræður hefjast.
Meðfylgjandi er dreifibréf nr. 11/2017 þar sem breytingarnar eru kynntar nánar.