Ísland mætir Úkraínu í kvöld kl. 18:30
Ísland tekur á móti Úkraínu í kvöld í seinni umspilsleik þjóðanna um sæti í úrslitakeppni EM kvenna 2013. Leikurinn fer fram á Laugardalsvelli og hefst kl. 18:30. Miðasala á leikinn er í gegnum miðasölukerfi hjá http://www.midi.is/ og einnig er hægt að kaupa miða í miðasölu Laugardalsvallar frá kl. 13:00.
Miðaverð er 1.000 krónur fyrir fullorðna en frítt er inn fyrir börn, 16 ára og yngri. Miðasalan á leikinn tók mikinn kipp í gær og má búast við góðri stemningu á vellinum í kvöld. Það er gríðarlega mikið í húfi hjá stelpunum, sæti í úrslitakeppninni í Svíþjóð 2013. Stuðningur áhorfenda skiptir gríðarlega miklu máli fyrir stelpurnar sem fara með 3 - 2 forystu inn í þennan leik eftir viðureign þjóðanna ytra.
Mætum öll á völlinn, klæðum okkur vel og styðjum okkar stelpur.
Áfram Ísland!
