EM U17 kvenna - Ísland mætir Spánverjum kl. 12:00
Það er komið að langþráðum degi því í dag kl. 12:00 mætast Ísland og Spánn í undanúrslitum úrslitakeppni EM U17 kvenna sem fram fer í Nyon í Sviss. Leikurinn verður í beinni útsendingu, eins og allir leikir keppninnar, á íþróttastöðinni Eurosport sem margir Íslendingar hafa aðgang að. Siðari undanúrslitaleikurinn er á milli Frakka og Þjóðverja og hefst hann kl. 16:00 að íslenskum tíma.
Það er mikil tilhlökkun í hópnum að takast á við þetta stóra verkefni og hefur Þorlákur Árnason tilkynnt byrjunarliðið fyrir leikinn.
Markvörður: Arna Lind Kristinsdóttir
Hægri bakvörður: Anna María Baldursdóttir
Vinstri bakvörður: Guðrún Arnardóttir
Miðverðir: Glódís Perla Viggósdóttir og Írunn Þorbjörg Aradóttir
Tengiliðir: Sigríður Lára Garðarsdóttir, Lára Kristín Pedersen og Hildur Antonsdóttir
Framherjar: Telma Þrastardóttir, Aldís Kara Lúðvíksdóttir og Guðmunda Brynja Óladóttir
Sigurvegarar leikja dagsins mætast svo í úrslitaleik næstkomandi sunnudag en fyrir þann leik, leika taplið dagsins um þriðja sætið.
Andstæðingar Íslendinga í dag, Spánverjar, eru núverandi handhafar titilsins eftir að hafa lagt Íra í úrslitaleik á síðasta ári með fjórum mörkum gegn einu. Árið áður höfðu Spánverjar einnig komist í úrslitaleikinn en lágu þá gegn Þjóðverjum, 7 - 0.
Þetta er í fjórða skiptið sem úrslitakeppni EM U17 kvenna er haldin og hefur hún frá byrjun verið skipuð fjórum þjóðum og haldin í Nyon. Þjóðverjar unnu 2 fyrstu árin en Spánverjar, eins og áður sagði, á síðasta ári.
Nú er að senda góða strauma til stelpnanna, hörkurviðureign gegn Spánverjum framundan.
ÁFRAM ÍSLAND!
.jpg?proc=760)
.jpg?proc=760)
