Vináttulandsleikur gegn Ungverjum 10. ágúst
Knattspyrnusambönd Íslands og Ungverjalands hafa komist að samkomulagi um að karlalandslið þjóðanna leiki vináttulandsleik 10. ágúst. Leikið verður í Ungverjalandi en í samkomulaginu er kveðið á um að þjóðirnar leiki svo á Laugardalsvelli á næsta eða þarnæsta ári.
Þetta verður 10 landsleikur þjóðanna en Ungverjar hafa haft betur í sex leikjum en Ísland í þremur. Síðast áttust þjóðirnar við í undankeppni fyrir HM 2006 og var leikið á Laugardalsvelli. Ungverjar höfðu betur í hörkuleik, 2 - 3. Ungverjar eru í 36. sæti á styrkleikalista FIFA um þessar mundir.