Ljóst hvaða þjóðir leika í úrslitakeppni EM U21 í Danmörku
Í gærkvöldi var það ljóst hvaða þjóðir munu leika í úrslitakeppni EM U21 karla í Danmörku á næsta ári. Ísland er þar á meðal átta þjóða í úrslitakeppni og er það í fyrsta skiptið sem það gerist í þessum aldursflokki. Aðrar þjóðir eru auk gestgjafanna í Danmörku: Tékkland, Spánn, England, Sviss, Hvíta Rússland og Úkraína.
Dregið verður í riðla í Álaborg í Danmörku, 9. nóvember næstkomandi. Þjóðunum er raðað niður eftir árangri í undankeppninni og er Ísland í efri styrkleikaflokki ásamt gestgjöfum Danmerkur, Tékklandi og Spáni.
Danir og Tékkar fara í sinn hvorn riðilinn, Danir sem gestgjafar og Tékkar sem sú þjóð sem bestan árangur er með eftir undankeppnina. Þá eru eftir úr efri styrkleikaflokki Spánn og Ísland sem verða dregin í sinn hvorn riðilinn og geta þ.a.l. ekki lent saman í riðli. Eftir það er dregið úr neðri styrkleikaflokknum en þar eru: England, Sviss, Hvíta Rússland og Úkraína. Skiptast þessar þjóðir niður á riðlana tvo, tvær þjóðir í hvorn riðil.
Úrslitakeppnin sjálf fer svo fram í Danmörku dagana 11. - 25. júní á næsta ári. Leikið verður í: Álaborg, Viborg, Herning og Árósum.