Mætum öll í bláu
Það hefur löngum verið siður stuðningsmanna knattspyrnuliða að klæðast litum sinna liða á kappleikjum. Þetta þekkjum við vel frá knattspyrnuleikjum félagsliða, hér á landi sem annars staðar. Þessi siður er enn sterkari þegar kemur að landsliðum og sést best þegar við sjáum sýnt frá leikjum í stórmótum eins og úrslitakeppni HM eða EM. Þar sameinast stuðningsmenn allra félagsliða í sínu landi undir merkjum þjóðarinnar, í sameiginlegum litum. Hollendingar eru gott dæmi um þetta, enda er það skylda hvers Hollendings sem mætir á landsleik að klæðast einhverju appelsínugulu, hvort sem það er treyja, trefill, húfa eða eitthvað annað.
Laugardaginn 6. júní mætum við Íslendingar Hollendingum á Laugardalsvellinum. Við verðum að taka gestina til fyrirmyndar og fella þá á eigin bragði. Við eigum öll að mæta á völlinn í einhverju bláu. Það skiptir engu máli hvað það er. Það getur verið gamall landsliðsbúningur eða bara blár bolur sem þið áttuð inni í skáp, blá húfa, blár trefill, eða hvað sem er. Þennan dag á blár að vera sá litur sem allir klæðast. Stúkan á að vera full af fólki sem klæðist bláu, vegna þess að íslenska landsliðið leikur í bláum búningum, og við erum öll saman í íslenska landsliðinu. Stuðningsmenn allra liða sameinist undir merkjum Íslands, stöndum saman og gerum stúkuna að bláu hafi á þessum mikilvæga landsleik.
Strákarnir treysta á öflugan stuðning og ef áhorfendaskarinn er klæddur í sama lit og liðið okkar leikur í, þá mun það vafalaust berja strákunum okkar baráttuanda í brjóst.
Ég hlakka til að sjá ykkur á vellinum.
Áfram Ísland!
Ólafur Jóhannesson, landsliðsþjálfari
E.S. Ef þið komist ekki á völlinn og horfið á leikinn í sjónvarpinu heima, verið þá samt í bláu. Við vitum af ykkur.