• mán. 14. apr. 2025
  • Fræðsla

Andriy Shevchenko sérstakur gestur á Norrænu knattspyrnuráðstefnunni 2025

Andriy Shevchenko, fyrrverandi landsliðsmaður og landsliðsþjálfari Úkraínu, og núverandi formaður knattspyrnusambands Úkraínu, verður sérstakur gestur (keynote speaker) á Norrænu knattspyrnuráðstefnunni (Nordic Football Research Conference 2025) sem fram fer í Háskólanum í Reykjavík (HR) dagana 21.-22. maí næstkomandi í samstarfi KSÍ og HR.  Þetta er í annað sinn sem þessi ráðstefna er haldin, en knattspyrnusambönd á Norðurlöndum skiptast á að halda þessa ráðstefnu í samstarfi við háskóla í sínu landi. 

Shevchenko átti glæstan feril sem leikmaður og hlaut m.a. hin eftirsóttu verðlaun Gullboltann (Ballon d´Or) árið 2004, sem eru veitt besta leikmanni í Evrópu á ári hverju.  Hann lék með Dynamo Kiev í heimalandinu, ítalska liðinu AC Milan og enska liðinu Chelsea, auk þess að leika 111 leiki (48 mörk) fyrir A landslið þjóðar sinnar, sem hann þjálfaði síðan árin 2016-2021, auk þess að vera þjálfari Genoa í ítölsku deildinni um skeið tímabilið 2021-2022.  Í janúar 2024 var hann kjörinn forseti Knattspyrnusambands Úkraínu.  Shevchenko var í framboði til framkvæmdastjórnar UEFA fyrr í þessum mánuði ásamt fjórum öðrum frambjóðendum sem kepptu um tvö sæti, en náði ekki kjöri. 

Ráðstefnan fer fram dagana 21.-22. maí eins og kemur fram hér að ofan.  Kvöldið áður, þann 20. maí kl. 19:00-21:00 verður haldinn sérstakur opnunarviðburður í höfuðstöðvum KSÍ á Laugardalsvelli (3. hæð), spurt og svarað (Q&A) með Andriy Shevchenko þar sem boðið verður upp á léttar veitingar.  Einungis þau sem hafa keypt sér miða á ráðstefnuna geta sótt þann viðburð. 

Nánari upplýsingar um ráðstefnuna:  

Nordic Football Research Conference 2025 - Knattspyrnusamband Íslands 

Einnig er hægt að skoða viðburðinn á Facebook. 

Á ráðstefnunni koma saman sérfræðingar á sviði þjálfunar, frammistöðu, greininga og sálfræði fyrir knattspyrnu.  Markmiðið er að hjálpa knattspyrnusamböndum, félögum og þjálfurum að ná árangri á vellinum með hagnýtingu þessara fræða. 

Þjálfarar með UEFA/KSÍ þjálfararéttindi fá 15 endurmenntunarstig fyrir að sitja ráðstefnuna. Samkvæmt reglum UEFA um þjálfaramenntun þá þurfa þjálfarar að sækja 15 endurmenntunarstig yfir þriggja ára tímabil, til að endurnýja þjálfararéttindi.