Ársþing KSÍ sendi frá sér áskorun til stjórnvalda
Mynd - Mummi Lú
Á 79. ársþingi KSÍ sem fram fór á Hilton Nordica laugardaginn 22. febrúar lagði stjórn KSÍ fram ályktun um áskorun á stjórnvöld er varðar ferðasjóð íþróttafélaga. Tillagan var samþykkt með miklum meirihluta og hefur áskorunin verið send út til viðeigandi aðila.
Áskorunina má sjá í heild hér fyrir neðan.
Reykjavík 22. febrúar 2025
FERÐASJÓÐUR ÍÞRÓTTAFÉLAGA – ÁSKORUN TIL STJÓRNVALDA
79. ársþing Knattspyrnusambands Íslands árið 2025, sem haldið var á Hilton Nordica hóteli
laugardaginn 22. febrúar s.l., skorar á ríkisstjórn Íslands að hækka framlag ríkissjóðs til
ferðasjóðs íþróttafélaga strax á árinu 2025. Það er einn liður í því að íþróttaiðkun barna og
unglinga geti þrifist á landsbyggðinni.
Greinargerð
Ferðasjóður íþróttafélaga er sjóður sem hefur mikla þýðingu fyrir íþróttahreyfinguna og þá
sérstaklega þau íþróttafélög sem þurfa um langt að fara til að sækja keppnisleiki.
Öll íþrótta- og ungmennafélög innan ÍSÍ hafa rétt til að sækja um styrk í sjóðinn, fyrir alla
aldurshópa í viðurkenndum íþróttagreinum innan ÍSÍ á fyrirfram skilgreind styrkhæf mót.
Úthlutanir úr umræddum ferðasjóð hafa frá árinu 2017-2024 staðið í stað í um 125 m.kr. á ári. Á
sama tímabili hefur heildarupphæð umsókna hækkað úr 470 í 650 m.kr. Það er því ljóst að
framlög í sjóðinn hafa ekki fylgt þeim hækkunum sem hafa orðið á ferðakostnaði íþróttafélaga
undanfarin ár.
Innan knattspyrnuhreyfingarinnar eru aðildarfélög sem hafa töluverðan hag af því að framlög
ríkisins í ferðasjóð íþróttafélaga endurspegli betur þann ferðakostnað sem félög bera.
Ferðakostnaður aðildarfélaga á landsbyggðinni er verulega stór kostnaðarliður í starfsemi þeirra
og þær hækkanir sem hafa komið til á undanförnum árum gera rekstur félaganna enn erfiðari,
áskoranir þeirra með reksturinn eru nú þegar nægar. Það skapar hættu á því að félög á
landsbyggðinni dragi sig mögulega úr keppni og þá sérstaklega hjá yngri flokkum iðkenda.
Knattspyrnuhreyfingin í heild sinni stendur sem ein heild fyrir því að aðildarfélög KSÍ á
landsbyggðinni njóti meiri endurgreiðslu á ferðakostnaði en nú er. Til að svo verði þurfa
stjórnvöld að endurskoða framlög til ferðasjóðsins þannig að hlutfall úthlutunar á móti
raunkostnaði haldist a.m.k. á milli ára.
.jpg?proc=760)
.jpg?proc=760)
