KSÍ hlýtur Samfélagslampa Blindrafélagsins 2024
KSÍ og Blindrafélagið skrifuðu í september 2023 undir samstarfssamning vegna sjónlýsingar á leikjum A landsliða karla og kvenna í fótbolta. Félagsmenn Blindrafélagsins geta þannig fengið beina lýsingu á atvikum leiksins í gegnum sérstakt app, lýsingu sem er sérsniðin að þörfum blindra og sjónskertra.
Stjórn Blindrafélagsins hefur ákveðið að veita KSÍ Samfélagslampann 2024 vegna þessa verkefnis, “fyrir frumkvæði að bættu aðgengi að íþróttaviðburðum og að opna aðgang blindra og sjónskertra að landsleikjum í knattspyrnu“. Sigþór U. Hallfreðsson, formaður Blindrafélagsins mun afhenda formanni KSÍ, Þorvaldi Örlygssyni, Samfélagslampa Blindrafélagsins 2024 fyrir leik A landsliðs karla við Wales á Laugardalsvelli á föstudag.
Fyrsta sjónlýsingin á knattspyrnuleik á Íslandi fór fram þann 17. júní 2023 þegar A landslið karla tók á móti Slóvakíu í undankeppni EM 2024. Þorkell Gunnar Sigurbjörnsson sá um lýsinguna á vegum Samtaka íþróttafréttamanna. Smellið hér að neðan til að spila myndband um sjónlýsinguna.
Myndband um Sjónlýsingu á landsleikjum
Um Samfélagslampa Blindrafélagsins
Tilgangurinn með veitingu Samfélagslampans er vekja athygli á fyrirtækjum, stofnunum og/eða tilteknum aðgerðum eða verkefnum, sem með einum eða öðrum hætti hafa stuðlað að auknu sjálfstæði blindra og sjónskertra einstaklinga. Samfélagslampi Blindrafélagsins, er einstakur gripur, handsmíðaður af Sigmari Ó Maríussyni, gullsmíðameistara. Um er að ræða upphleypta lágmynd úr silfri sem sýnir lampann úr merki Blindrafélagsins. Lampinn er festur á sagaða og slípaða steinflís úr skagfirsku blágrýti. Steinflísin stendur á tveimur járnpinnum á blágrýtisfæti. Á fætinum er síðan silfurskjöldur með áletrun um verkið og tilefni þess.
Mynd með grein: Mummi Lú.
.png?proc=760){kind=logo}
.jpg?proc=760)
