Grasrótarfélag KSÍ 2023 er Reynir Hellissandi
Grasrótarverðlaunum KSÍ er skipt upp í þrjá flokka: Grasrótarverkefni ársins, Grasrótarfélag ársins og Grasrótarpersóna ársins. Þetta er í annað sinn sem verðlaunum er þrískipt með þessum hætti.
Mjög ánægjulegt var að sjá hversu margar flottar tilnefningar bárust í öllum þremur flokkunum í ár og greinilegt að grasrótarstarf í fótbolta er í miklum blóma víðs vegar um land. Það var verðugt verkefni að velja úr og margar tilnefningar komu til greina.
Grasrótarfélag KSÍ 2023: Reynir Hellissandi
Grasrótarfélag KSÍ árið 2023 er Reynir Hellissandi fyrir jákvæð og heilsueflandi áhrif á samfélag sitt.
Í umsögn með tilnefningu Reynis H. segir m.a.: Félagið hefur haft gríðarlega mikil og jákvæð og heilsueflandi áhrif á samfélagið og haldið stórum hópi einstaklinga lengur í þessari fallegu íþrótt sem fótbolti er. Ekki má gleyma áhrifum heimildarmyndarinnar Heimaleikurinn sem slegið hefur í gegn og virðist ætla að sigra heiminn. Myndin, sem fjallar um langþráðan vígsluleik á Reynisvelli á Hellissandi, hefur nú þegar unnið til þriggja verðlauna á heimildamyndahátíðum erlendis og á þessu ári verður myndin sýnd á fjölmörgum hátíðum um allan heim. Í myndinni má sjá mannlegan og skemmtilegan vinkil sem flest knattspyrnuáhugafólk getur tengt við. Yngri flokkar starfa undir merki Víkings/Reynis og er haldið úti í samstarfi með nágrönnunum í Víking Ólafsvík. Þessir flokkar keppa svo í nafni Snæfellsnessamstarfsins með krökkum frá Grundarfirði og Stykkishólmi.
Á myndinni eru Gunnar Örn Arnarson stjórnarmaður hjá Reyni og markmaður og Kári Viðarsson formaður meistaraflokksráðs hjá Reyni og miðjumaður ásamt Sóleyju Guðmundsdóttur frá KSÍ
