Upplýsingar um tillögur og málefni og fjölda þingfulltrúa á Knattspyrnuþingi 2024
78. ársþing KSÍ verður haldið í Íþróttamiðstöð Fram í Úlfarsárdal, Reykjavík 24. febrúar 2024. Sambandsaðilar hafa verið beðnir um að kynna sér eftirfarandi:
1. Skuldir
Aðilar sem vanrækja uppgjör á gjöldum sem greiða skal til KSÍ missa rétt til þingsetu, sbr. grein 10 í lögum KSÍ. Þeim félögum, sem eru í skuld við KSÍ, er bent á að hafa tafarlaust samband við Bryndísi Einarsdóttur, fjármálastjóra KSÍ (bryndis@ksi.is).
2. Tillögur og málefni
Tillögur þær er sambandsaðilar óska eftir að verði teknar fyrir á þingi skulu berast stjórn KSÍ minnst mánuði fyrir þing eða í síðasta lagi miðvikudaginn 24. janúar nk. Haukur Hinriksson lögfræðingur á skrifstofu KSÍ (haukur@ksi.is) tekur við tillögum og veitir aðstoð við uppsetningu þeirra sé þess óskað. Í samræmi við grein 11 í lögum KSÍ munu tillögur, sem berast fyrir þingið, vera yfirfarnar af laga- og leikreglnanefnd KSÍ en nefndinni ber að kanna hvort tillögurnar samræmist lagaákvæðum og skuldbindingum KSÍ.
3. Dagskrá
Þingið verður sett kl. 11:00, laugardaginn 24. febrúar og er gert ráð fyrir að því ljúki um kl. 17:00 sama dag. KSÍ býður þingfulltrúum til sameiginlegs kvöldverðar eftir ársþingið. Nákvæm dagskrá verður send sambandsaðilum síðar.
4. Fjöldi fulltrúa
Smellið hér að neðan til að skoða lista yfir fjölda þingfulltrúa. Sambandsaðilar eru beðnir um að fara yfir listann og gera athugasemdir ef þörf krefur.
Lög KSÍ - Réttur til þingsetu
10.1 Knattspyrnuþingið sitja fulltrúar frá aðildarfélögum KSÍ. Aðildarfélög KSÍ skulu eftir fremsta megni tilnefna fulltrúa þannig að tekið sé mið af jafnri stöðu kynja.
10.2 Fulltrúafjöldi aðildarfélaga ákvarðast af þátttöku þeirra í Íslandsmóti meistaraflokks sem hér segir:
- a. Fyrir félag, sem hefur rétt til þátttöku í efstu deild karla og/eða kvenna á komandi leiktíð, komi 4 fulltrúar.
- b. fyrir félag, sem hefur rétt til þátttöku í 1. deild karla og/eða kvenna á komandi leiktíð, komi 3 fulltrúar.
- c. fyrir félag, sem hefur rétt til þátttöku í 2. deild karla á komandi leiktíð, komi 2 fulltrúar.
- d. fyrir félag, sem hefur rétt til þátttöku í neðri deildum karla og/eða kvenna á komandi leiktíð en um getur í liðum a.-c., komi 1 fulltrúi, enda hafi það tekið þátt í Íslandsmóti meistaraflokks (sjálfstætt eða í sameiginlegu liði) síðustu fimm leiktíðir samfleytt.
- e. fyrir sameiginlegt lið félaga komi fulltrúar sbr. a.-d., sem skiptast milli félaga sem standa að liðinu, skv. samkomulagi þeirra á milli ella fellur réttur til fulltrúa niður.
Fulltrúafjöldi aðildarfélags skal einungis ákvarðast af einum þeirra liða a. til e. sem gefur flesta fulltrúa. Félag sem ekki tefldi fram í móti á vegum KSÍ á síðasta keppnistímabili að minnsta kosti einu liði í yngri flokkum (3. – 6. flokk), getur að hámarki verið með einn fulltrúa.
