Breiðablik og Víkingur R. mætast í bikarúrslitum kvenna
Mynd: Mummi Lú
Breiðablik og Víkingur R. mætast í úrslitaleik Mjólkurbikars kvenna. Leikurinn fer fram á Laugardalsvelli þann 12. ágúst kl. 16:00.
Víkingur R. vann 2-1 sigur á FH í fyrri undanúrslitaleiknum þar sem Sigdís Eva Bárðardóttir skoraði bæði mörk Víkings og Hildigunnur Ýr Benediktsdóttir skoraði mark FH. Er þetta í fyrsta skipti í sögunni sem kvennalið Víkings kemst í bikarúrslit.
Í síðari undanúrslitaleiknum vann Breiðablik sigur á Stjörnunni í vítaspyrnukeppni. Staðan eftir venjulegan leiktíma var 1-1 og grípa þurfti til framlengingar. Að framlengingu lokinni var staðan 2-2. Mörk Breiðabliks skoruðu Agla María Albertsdóttir og Hafrún Rakel Halldórsdóttir og mörk Stjörnunnar skoruðu Betsy Hessett og Andrea Mist Pálsdóttir. Í vítakeppninni skoraði Breiðablik úr öllum sínum spyrnum en Stjarnan skoraði úr einni af þremur.
Er þetta þriðja árið í röð sem Breiðablik spilar úrslitaleikinn og hefur liðið unnið titilinn þrettán sinnum.
