Kynning á landsliðsumhverfinu og bókinni „Sálfræði í knattspyrnu“
Miðvikudaginn 17. maí hélt KSÍ fund þar sem yfirþjálfarar, afreksþjálfarar, yfirmenn knattspyrnumála og aðrir sem tengjast afreksþjálfun félaganna, fengu kynningu frá Davíð Snorra Jónassyni þjálfari U21 landsliðs karla og Jóhannesi Karli Guðjónssyni aðstoðarþjálfari A landsliðs karla á því sem er að gerast í landsliðsumhverfinu og hugmyndafræði landsliða Íslands. Þeir sögðu einnig frá heimsókn KSÍ til danska sambandsins þar sem sálfræðiþátturinn og leikgreiningar voru í fyrirrúmi.
Á fundinum kynnti Grímur Gunnarsson sálfræðingur KSÍ verkefnið „Sálfræði í knattspyrnu", sem unnið var í samstarfi við Háskólann í Reykjavík. Markmið verkefnisins er að auka vitund leikmanna, þjálfara og foreldra á hugrænum þáttum í knattspyrnu. Ósk Gríms er að ungir iðkendur líti á hugræna færni sem færni sem hægt er að þjálfa eins og alla aðra færni í knattspyrnu.
Undanfarin ár hafa verið gerðar mælingar á hugrænni færni leikmanna æfingahópa íslands í knattspyrnu, og í kjölfarið var ákveðið að gera sambærilegar mælingar á öllum 16 ára knattspyrnuiðkendum landsins. Í kjölfar mælinganna var gefin út bók undir ritstjórn Gríms Gunnarssonar sem er hugsuð sem grunnfræðsla um sálfræði í knattspyrnu. Efni bókarinnar byggir á kennslubókum og fræðibókum í íþróttasálfræði ásamt fræðigreinum.
Hér má sjá frekari upplýsingar um verkefnið "Sálfræði í knattspyrnu"
.jpg?proc=760)
