Breiðablik og Valur mætast í bikarúrslitum kvenna
Mynd: Hulda Margrét
Ríkjandi bikarmeistarar Breiðabliks og ríkjandi Íslandsmeistarar Vals tryggðu sér um helgina farseðil í úrslitaleik Mjólkurbikars kvenna sem fram fer á Laugardalsvelli 27. ágúst.
Í undanúrslitum mættust Valur og Stjarnan annars vegar og Breiðablik og Selfoss hins vegar.
Valskonur sigruðu Stjörnuna með þremur mörkum gegn einu. Mist Edvardsdóttir skoraði eitt mark fyrir Val og Cyera Makenzie Hintzen skoraði tvö. Jasmín Erla Ingadóttir skoraði mark Stjörnunnar.
Breiðablik sigraði Selfoss 2-0. Mörk Blika skoruðu Agla María Albertsdóttir og Helena Ósk Hálfdánardóttir.
Breiðablik og Valur hafa bæði sigrað bikarinn 13 sinnum, oftast allra liða.
