Undankeppni HM 2023 - A kvenna leikur í Utrecht
A landslið kvenna mætir Hollandi ytra 6. september næstkomandi í lokaleik sínum í undankeppni HM 2023. Leikstaður og leiktími hefur nú verið staðfestur. Leikurinn fer fram 6. september sem fyrr segir, á Stadion Galgenwaard í Utrecht, hefst kl. 18:45 að íslenskum tíma og verður í beinni útsendingu á RÚV.
Stuðningsmenn sem hyggjast kaupa miða á leikinn eru beðnir um að bíða með það þar til KSÍ verður komið með upplýsingar um miðasölu, til að tryggja að fólk geti þá keypt miða í svæði íslenskra stuðningsmanna á leiknum. Þessar upplýsingar verða birtar á miðlum KSÍ um leið og allt skýrist.
