Jafntefli gegn Belgíu
A landslið kvenna gerði 1-1 jafntefli við Belgíu í fyrsta leik sínum á EM 2022, en liðin mættust í Manchester að viðstöddum ríflega tvö þúsund íslenskum stuðningsmönnum sem létu vel í sér heyra.
Jafnræði var með liðunum framan af leiknum og bæði lið gerðu sig líkleg í sóknarleiknum. Íslenska liðið fékk gullið tækifæri til að ná forystunni á 33. mínútu þegar boltinn fór í hönd varnarmanns Belga og vítaspyrna dæmd. Berglind Björg Þorvaldsdóttir fór á punktinn en brást bogalistin og markvörður belgíska liðsins varði. Berglind bætti þó fyrir það þegar hún náði forystunni fyrir Ísland á 50. mínútu leiksins með skalla eftir fyrirgjöf frá Karólínu Leu Vilhjálmsdóttur.
Íslenska liðið var sterkari aðilinn í seinni hálfleik og sótti hart að belgíska markinu, en það voru þó Belgarnir sem jöfnuðu metin úr vítaspyrnu á 67. mínútu. Þar við sat og liðin skildu jöfn, 1-1. Næsti leikur íslenska liðsins er gegn Ítalíu á fimmtudag, einnig í Manchester. Leikurinn verður í beinni útsendingu á RÚV og einnig verður hægt að fylgjast með gangi mála á samfélagsmiðlum KSÍ (@footballiceland).
.JPG?proc=760)
.jpg?proc=760)