U19 - Frábær 3-0 sigur gegn Rúmeníu
U19 ára landslið karla vann frábæran 3-0 sigur gegn Rúmeníu í síðasta leik liðsins í milliriðlum undankeppni EM 2022.
Andi Hoti skoraði tvö fyrstu mörk Íslands í leiknum, bæði eftir hornspyrnur, það fyrra með skoti eftir klafs í teignum og það síðara með skalla, og Ísak Andri Sigurgeirsson skoraði þriðja mark leiksins þegar hann vann boltann af rúmenskum varnarmanni og skoraði með stórglæsilegu skoti efst í markhornið.
Ísland hafnar í öðru sæti riðilsins með fjögur stig, en Rúmenía fer áfram í lokakeppni EM þrátt fyrir tapið í dag, eftir að hafa endað í efsta sæti riðilsins með sex stig.
