.jpg?proc=1152)
Jafnréttisverðlaun KSÍ 2021: Berglind Ingvarsdóttir og Þorbjörg Helga Ólafsdóttir
Jafnréttisverðlaun KSÍ fyrir árið 2021 hljóta Berglind Ingvarsdóttir og Þorbjörg Helga Ólafsdóttir fyrir fótboltaspjöld kvennalandsliðsins. Það var Arnar Þór Viðarsson sviðsstjóri knattspyrnusviðs KSÍ sem afhenti Berglindi og Þorbjörgu verðlaunin.
Fyrir jólin 2021 gaf KSÍ út jóladagatal íslenska kvennalandsliðsins í fótbolta. Dagatalið innihélt 24 númeruð umslög með 48 fótboltaspjöldum sem skarta myndum og fróðleik um íslenskar landsliðskonur fyrr og nú. Framleiðsla, hönnun og efnisöflun var í höndum Berglindar Ingvarsdóttur og Þorbjargar Helgu Ólafsdóttur. Hugmyndin kom einnig frá Berglindi og Þorbjörgu Helgu sem bjuggu til dagatal með 24 bestu fótboltakonum í heimi fyrir jólin 2020 fyrir fjáröflun dætra sinna sem spila í yngri flokkum Þróttar R. Að þeirra mati hafði verið klár vöntun á fótboltaspjöldum í kvennaboltanum og var þessi útgáfa því frábær viðbót við það sem hefur verið í boði hingað til og góð leið til að kynnast stelpunum í landsliðinu betur áður en þær halda á EM á Englandi sumarið 2022.
.jpg?proc=760)
.jpg?proc=760)