Grasrótarfélag ársins 2021: Uppsveitir
Grasrótarverðlaun KSÍ 2021
Grasrótarverðlaun KSÍ eru veitt sem viðurkenningar fyrir starf að grasrótarmálum í knattspyrnu. Verðlaunin, sem eru afhent í aðdraganda ársþings KSÍ ár hvert, eru nú í fyrsta sinn veitt í þremur flokkum:
- Grasrótarverkefni ársins
- Grasrótarfélag ársins
- Grasrótarpersóna ársins
Grasrótarverðlaun KSÍ fyrir árið 2021 í flokknum Grasrótarfélag ársins hljóta Uppsveitir fyrir frábært uppbyggingarstarf í knattspyrnu barna og unglinga. Það voru þeir Gústaf Sæland og Sólmundur Magnús Sigurðarson frá Uppsveitum sem tóku við verðlaununum frá formanni KSÍ, Vöndu Sigurgeirsdóttur. Önnur grasrótarverðlaun ársins og aðrar viðurkenningar verða afhentar næstu daga.
Félagið Uppsveitir (ÍBU) var stofnað árið 2019 með það fyrir augum að lyfta íþróttastarfi í Uppsveitum Árnessýslu á hærra plan og veita iðkendum tækifæri á fleiri æfingum og möguleikum á að keppa í sinni íþrótt. Uppsveitir halda úti knattspyrnuæfingum fyrir börn og unglinga í Árnesi, Borg, Brautarholti, Flúðum, Laugarvatni og Reykholti.
Í verkefninu „Komdu í fótbolta“ síðasta sumar heimsótti Moli fimm af þessum stöðum og komu alls 95 börn og unglingar til að hitta hann og leika sér í fótbolta. Ánægjan og gleðin skein af andlitum allra sem komu að heimsóknunum, hvort heldur sem það voru börnin, þjálfararnir eða foreldrarnir.
Augljóst þykir að hjá Uppsveitum er unnið frábært starf í knattspyrnu barna og unglinga og þar kristallast mikilvægi knattspyrnunnar í samfélagi okkar, jafnt í stórum sveitarfélögum sem smáum.
.jpg?proc=760)
.jpg?proc=760)