Leyfisferlið vegna tímabilsins 2022 hafið
Í samræmi við leyfisreglugerð KSÍ (útg. 4.3.) er þeim félögum sem hyggjast sækja um þátttökuleyfi í efstu deild karla, efstu deild kvenna og 1. deild karla árið 2022 hér með sendar nauðsynlegar upplýsingar, áður en vinna við leyfisumsókn hefst. Leyfisferlið vegna tímabilsins 2022 hófst formlega í dag þann 15. nóvember, líkt og ár hvert.
Leyfisreglugerðin:
Í leyfisreglugerðinni er að finna allar nauðsynlegar upplýsingar um allar forsendur sem þarf að uppfylla og er félögum bent á að kynna sér reglugerðina vel. Leyfisumsækjandi verður að standa skil á öllum nauðsynlegum upplýsingum og/eða viðeigandi skjölum til að sýna fram á að allar skyldur séu uppfylltar sem leyfiskerfið hefur í för með sér til leyfisveitanda.
Leyfisfulltrúi:
Hvert félag tilnefnir einn leyfisfulltrúa. Leyfisfulltrúi félagsins er sá aðili sem leyfisstjóri KSÍ hefur að mestu samskipti við vegna leyfiskerfisins og er sá aðili sem allar upplýsingar eru sendar á. Leyfisfulltrúi félagsins kemur skilaboðunum síðan áfram innan síns félags.
Trúnaður:
KSÍ er bundið trúnaði gagnvart leyfisumsækjendum og er ekki heimilt að gefa óviðkomandi aðilum upp neinar upplýsingar úr leyfisgögnum leyfisumsækjenda, skv. trúnaðaryfirlýsingu þar um. Allir aðilar sem koma að leyfiskerfinu fyrir hönd KSÍ undirrita slíka trúnaðaryfirlýsingu.
Lykildagsetningar:
Skil á gögnum, öðrum en fjárhagslegum, eigi síðar en 15. janúar 2022.
Fjárhagslegum gögnum skilað eigi síðar en 20. febrúar 2022.
Ársreikningur 2021 verður því að vera staðfestur af stjórn leyfisumsækjanda og aðalfundi í síðasta lagi 20. febrúar 2022.
Beiting dagsekta:
Leyfisráð KSÍ vill koma því á framfæri til félaga í leyfiskerfinu að verði lykildagsetningar ekki virtar mun leyfisráð beina því til aga- og úrskurðarnefndar KSÍ að beita viðurlögum gagnvart viðkomandi félagi/félögum í samræmi við 13. grein reglugerðar KSÍ um aga- og úrskurðarmál.
Eftirfarandi viðurlögum er hægt að beita séu tímamörk ekki uppfyllt:
→ Viðvörun og sekt; við fyrsta brot skal beita dagsektum að upphæð kr. 3.000 fyrir hvern dag sem líður þangað til viðeigandi gögnum hefur verið skilað, að hámarki kr. 100.000.
→ Áminning og sekt; við ítrekað brot skal beita dagsektum að upphæð kr. 5.000 fyrir hvern dag sem líður þangað til viðeigandi gögnum hefur verið skilað, að hámarki kr.200.000.
→ Stigatap; við alvarlegt og ítrekað brot er jafnframt heimilt að draga allt að 3 stig frá félaginu í deildarkeppninni.
Leyfisdómur:
Rétt er að taka fram, ef til þess kemur að leyfisráð synji félagi um þátttökuleyfi t.d. vegna ófullnægjandi gagnaskila, þá er hlutverk leyfisdóms við áfrýjun einungis að endurmeta hvort ákvörðun leyfisráðs hafi verið rétt eða röng miðað við fyrirliggjandi gögn. Það þýðir að félög gætu t.d. ekki bætt úr ófullnægjandi gagnaskilum fyrir leyfisdómi ef til þess kæmi.
Fjárhagsleg leyfisgögn:
Félög í Pepsi Max deild karla þurfa fulla áritun endurskoðanda á ársreikning sinn. Félög í Pepsi Max deild kvenna og Lengjudeild karla þurfa könnunaráritun endurskoðanda á ársreikning sinn. Ath: Ef félag, sem starfrækir kvennalið í leyfiskerfinu, starfrækir einnig karlalið í efstu deild, þá þarf fulla áritun endurskoðanda á sameiginlegan ársreikning.
Staðfestingar einstaklinga um engin vanskil (nýtt):
Félög eru minnt á staðfestingar vegna engra vanskila við leikmenn, þjálfara og aðra einstaklinga sem heyra undir skilgreiningu reglugerðarinnar á orðinu „starfsmenn“.
Á komandi leyfistímabili verður tekið í notkun nýtt vefform með það að markmiði að takmarka skjalasöfnun félaga vegna skilyrðis um engin vanskil vegna starfsmanna (grein 54). Á næstu dögum mun KSÍ í samstarfi við Advania koma upp vefformi/tengli á heimasíðu KSÍ. Þar munu einstaklingar, starfsmenn, leikmenn, þjálfarar, læknar, sjúkraþjálfarar og annað starfsfólk íþróttafélaga geta smellt á þann tengil til að komast inn í tiltekið viðmót. Þar eru einstaklingar beðnir um auðkenningu með rafrænum skilríkjum eða íslykli. Að auðkenningu lokinni opnast formið þar sem starfsmaðurinn velur í fellilista fyrir hvaða íþróttafélag viðkomandi starfar eða hefur starfað fyrir á árinu 2021. Að því loknu er starfsmaðurinn sendur á undirritunarglugga, þar sem viðkomandi getur skoðað viðeigandi skuldleysisyfirlýsingu og valið að undirrita hana.
Að undirritun lokinni er skjal sjálfkrafa sent á “endapunkt” hjá KSÍ þar sem skjalið er vistað niður í möppu sem merkt er viðkomandi íþróttafélagi. Leyfisstjóri hefur síðan aðgang að þessum möppum og getur fært undirrituð skjöl til sín og fengið upplýsingar/lista yfir undirrituð skjöl (nafn félags og nöfn undirritenda).
Leyfisvefurinn á ksi.is og tækjakassi:
Á vef KSÍ má finna allar helstu upplýsingar, eyðublöð og gátlista, reglugerðina sjálfa, o.s.frv. Nálgast má nauðsynleg gögn og sniðmát vegna umsóknar um þátttökuleyfi á tækjakassa leyfiskerfsins. Athugið að þar er alltaf að finna nýjustu útgáfu. Félög þurfa að gæta þess að nota ekki úreltar útgáfur skjala og nauðsynlegra staðfestinga.
Slóðin er þessi: https://www.ksi.is/leyfiskerfi/leyfiskerfi-ksi/taekjakassi/
Aðstoð á skrifstofu KSÍ:
Leyfisstjóri verður til taks á skrifstofu KSÍ ef spurningar vakna. Hlutverk leyfisstjóra er að halda utan um kerfið og aðstoða félögin við að útbúa leyfisumsókn. Ef leyfisstjóri kemur auga á eitthvað sem hann telur að gæti komið í veg fyrir veitingu þátttökuleyfis mun hann vinna með viðkomandi félagi að úrlausn málsins. Óskað er eftir að öllum fyrirspurnum sem ætlað er að beina til leyfisstjóra í tölvupósti verði send á vefpóst leyfiskerfisins: leyfiskerfi@ksi.is
Rafræn gagnaskil:
Óskað eftir því að félög skili öllum gögnum rafrænt í gegnum vefforritið Microsoft TEAMS. Forritið virkar þannig að hvert og eitt félag í leyfiskerfinu fær aðgang að sérstöku vefsvæði þar sem tilskyldum gögnum skal hlaðið upp. Einungis leyfisfulltrúar viðkomandi félags, leyfisstjóri og endurskoðendur á hans vegum hafa aðgang að vefsvæði hvers félag. Óskað er eftir því að hvert félag sendi til leyfisstjóra tölvupóstfang/email þeirra sem eiga að hafa aðgang að vefsvæði félagsins vegna skila á leyfisgögnum. Leyfisstjóri mun í framhaldinu veita viðkomandi aðilum aðgang.
.jpg?proc=760)
