Aukaþing KSÍ 2021 - Kosningar í bráðabirgðastjórn

Aukaþing KSÍ verður haldið þann 2. október nk. á Hilton Reykjavík Nordica að Suðurlandsbraut 2 í Reykjavík. Líkt og áður hefur komið fram verður þingið sett kl. 11:00.

Kosningar í stjórn á aukaþingi KSÍ 2021

Á aukaþingi KSÍ verður kosinn formaður og stjórn til bráðabirgða sem mun starfa fram að næsta knattspyrnuþingi sem haldið verður í febrúar árið 2022. Framboð til stjórnar KSÍ skal samkvæmt 15. gr., sbr. 13. gr. laga KSÍ berast skrifstofu KSÍ skriflega minnst einni viku fyrir aukaþing eða í síðasta lagi laugardaginn 25. september nk. Kjörnefnd er þó heimilt að samþykkja framboð sem fram kemur síðar ef nægjanlegur fjöldi hefur ekki tilkynnt framboð sitt innan tilkynningarfrests.

Minnt er á ákvæði í 15. grein laga KSÍ:

15.2.

Þeir sem bjóða sig fram til embætta sem kosið er um samkvæmt grein 15.1. skulu vera lögráða, fjár síns ráðandi og mega ekki á síðustu þremur árum hafa hlotið dóm fyrir refsiverðan verknað samkvæmt almennum hegningarlögum eða lögum um hlutafélög, einkahlutafélög, bókhald, ársreikninga eða skattalögum. Óheimilt er að velja einstaklinga sem vitað er til að hafi hlotið refsidóma vegna brota á ákvæðum XXII. kafla almennra hegningarlaga, nr. 19/1940 til starfa innan íþróttahreyfingarinnar.

15.3.

Sá sem býður sig fram til formanns eða stjórnar skal hafa skrifleg meðmæli aðildarfélaga sem fara samanlagt með a.m.k. 12 atkvæði á knattspyrnuþingi.

Með tilkynningu um framboð er óskað eftir stuttri ferilskrá til birtingar á heimasíðu KSÍ. Í samræmi við ákvörðun kjörnefndar skulu framboð ásamt skriflegum meðmælum á þar til gerðu eyðublaði (sjá hlekk hér að neðan), send með tölvupósti til lögfræðings á skrifstofu KSÍ (kolbrun@ksi.is) í síðasta lagi þann 25. september nk.

Meðfylgjandi eru nánari upplýsingar.

Vinsamlegast hafið samband við Kolbrúnu Arnardóttur, lögfræðing á skrifstofu KSÍ (kolbrun@ksi.is), ef frekari upplýsinga er óskað.

Bréf til félaga vegna kosninga

Framboðsyfirlýsing - Embætti formanns

Framboðsyfirlýsing - Stjórn og varastjórn

• Ársþing
• Stjórn