U16 ára landslið kvenna sigraði Danmörku 2
Íslenska U16 landslið kvenna vann 1-0 sigur á Danmörku 2 á opna Norðurlandamótinu fyrr í dag.
Þetta var annar leikur Íslands á mótinu en stelpurnar okkar gerðu 1-1 jafntefli við Svíþjóð í fyrsta leik.
Það var jafnræði með liðunum í fyrri hálfleik og bæði lið fengu tækifæri til að skora. Íslandi tókst það á 25. mínútu en þá skoraði Ísabella Sara Tryggvadóttir með skalla eftir fyrirgjöf Vigdísar Lilju Kristjánsdóttur.
Vigdís Lilja var ansi nálægt því að bæta við marki stuttu síðar en hún átti skalla í stöng og boltinn dansaði svo eftir marklínunni.
Danir voru með yfirhöndina í síðari hálfleik en okkar stúlkur lögðu sig allar fram og börðust fyrir sigrinum.
Á mótinu eru vítaspyrnukeppnir æfðar eftir alla leiki, óháð úrslitum og þar gerðu íslensku leikmennirnir vel og unnu 4-2 sigur. Margrét Rún Stefánsóttir markvörður gerði sér lítið fyrir og varði tvær fyrstu spyrnur Dana.
Sterkur sigur hjá U16 landsliðinu okkar sem mætir Danmörku 1 í lokaleik opna Norðurlandamótsins næsta mánudag kl.14:30 að íslenskum tíma.
