þri. 15. jún. 2021
Fræðsla

KSÍ V þjálfaranámskeið - hluti af KSÍ A þjálfaragráðunni

Næsta vetur mun Knattspyrnusamband Íslands halda KSÍ VI þjálfaranámskeið. Fyrsti hluti námskeiðsins er leikgreiningarnámskeið föstudaginn 10. september. Síðari hluti námskeiðsins verður svo í Danmörku dagana 27.október - 2. nóvember 2021.

Útlistun á umsóknarferli og uppbygging námskeiðsins í grófum dráttum er sem hér segir:

1. Allir þjálfarar sem sækja um þurfa að taka KSÍ A þjálfaraskólann. Þjálfarar þurfa að ljúka Þjálfaraskólanum í síðasta lagi 20. ágúst. Þjálfaraskóli KSÍ kostar 15.000 kr.
2. Þeir þjálfarar sem hafa tekið KSÍ A þjálfaraskólann áður, þurfa ekki að gera það aftur. En það er valfrjálst. Allir sem sækja um í fyrsta sinn þurfa hins vegar að taka KSÍ A þjálfaraskólann.
3. Umsækjendur þurfa jafnframt að hafa lokið KSÍ V þjálfaranámskeiði. Hins vegar verða þeir þjálfarar sem eiga eftir að taka KSÍ V (KSÍ A 1) námskeið að sitja það í haust en tvær dagsetningar eru í boði, 18.-19. september og 2.-3. október. Þeir þjálfarar þurfa samt sem áður að skila inn umsókn fyrir tiltekin tíma og taka Þjálfaraskólann.
4. Umsóknarfrestur er til þriðjudagsins 27. ágúst. Reiknað er með að fleiri þjálfarar sæki um námskeiðið en hægt er að taka inn. Umsækjendur þurfa því að fylla út umsóknareyðublað. Fræðslunefnd KSÍ mun svo í kjölfarið velja 16 þjálfara til þátttöku á námskeiðinu.
5. Hópurinn sem valinn verður mun svo hittast föstudaginn 10. september. Þá helgi verður námskeið í leikgreiningu og þátttakendur fá kennslu á Sideline hugbúnaðinn. Þátttakendur fá sinn eigin aðgang að Sideline analyzer í þrjá mánuði og Sideline organizer í eitt ár og er það innifalið í námskeiðgjaldinu.
6. Miðvikudaginn 27. október verður haldið til Kaupmannahafnar. Heimsóttir verða tveir klúbbar í ferðinni og mikil áhersla verður lögð á áætlanagerð (periodisation). Þátttakendur skila síðan ítarlegu áætlunargerðar verkefni í desember.

KSÍ VI þjálfaranámskeiðið er hluti af UEFA A þjálfaragráðunni en þjálfarar í Pepsi-deildum karla og kvenna, 1. deild karla, 1. deild kvenna, 2. deild karla og yfirþjálfarar unglingastarfs félaga í þessum deildum þurfa að hafa UEFA A þjálfaragráðu samkvæmt reglugerð KSÍ um menntun þjálfara og kröfu leyfisnefndar KSÍ.

Neðst í fréttinni er umsókn að KSÍ VI þjálfaranámskeiðinu og upplýsingar um Þjálfaraskóla KSÍ.

KSÍ vekur athygli á því að síðasti dagur til að skila inn umsókninni er 27. ágúst næstkomandi, en auðvitað má skila umsóknum fyrr. Ljúka þarf KSÍ A þjálfaraskólanum í síðasta lagi 20. ágúst.

ATH. Í samræmi við reglugerð UEFA um menntun þjálfara, þá þarf að líða a.m.k. eitt ár frá því að þjálfari klárar UEFA B þjálfaragráðuna þar til að þjálfari hefur nám á UEFA A þjálfaragráðu. Auk þess þurfa þjálfarar að hafa a.m.k. eins árs reynslu að baki sem þjálfarar í 11 manna bolta/4. flokkur eða eldri. Það þýðir að þeir þjálfarar sem kláruðu UEFA B þjálfaragráðuna á vorönn 2021 þurfa að bíða til 2022 með að sækja um inngöngu á UEFA A þjálfaragráðuna. Þeir þjálfarar sem klára UEFA B þjálfaragráðuna 2021 geta aftur á móti tekið KSÍ V (KSÍ A 1) námskeiðið.

Námskeiðið kostar 300.000 kr.

Fræðslunefnd KSÍ stefnir á að taka 16 þjálfara inn á námskeiðið.

Á námskeiðinu er 100% mætingarskylda og það er bæði bóklegt og verklegt. Þátttakendur gætu þurft að taka þátt í verklegum tímum. Á námskeiðinu kenna kennarar frá KSÍ og erlendir fyrirlesarar. Hluti námskeiðsins fer fram á ensku.

Dagskrá námskeiðsins er í vinnslu og verður gefin út þegar nær dregur.

Allar nánari upplýsingar um námskeiðið veita Dagur Sveinn Dagbjartsson í dagur@ksi.is og Arnar Bill Gunnarsson í arnarbill@ksi.is