Nýr tengiliður við fatlaða stuðningsmenn
KSÍ hefur tilnefnt Skarphéðin Guðmundsson sem tengilið við fatlaða stuðningsmenn landsliða (Disability Access Officer – DAO). Tengiliður milli fatlaðra stuðningsmanna landsliða Íslands í knattspyrnu og KSÍ (DAO) þarf að hafa þekkingu á því umhverfi sem stuðningsmenn lifa og hrærast í, vera eldheitur stuðningsmaður sjálfur, og vera sérstakur áhugamaður um málefni fatlaðra stuðningsmanna. Um er að ræða nýtt hlutverk hjá KSÍ og er Skarphéðinn, sem hefur starfað að stórum jafnt sem smáum verkefnum sem tengjast aðgengis- og aðstöðumálum fatlaðra, m.a. á Keflavíkurflugvelli, því fyrstur til að gegna því.
Hlutverk tengiliðs við fatlaða stuðningsmenn er að halda utan um stuðning/aðstoð við fatlaða stuðningsmenn. DAO fylgist m.a. með því að boðið sé upp á aðgengilega aðstöðu og þjónustu á landsleikjum, s.s. aðgengi að viðburðinum sjálfum (miðar og annað), aðgengi að salerni, aðgengi að veitingum og annarri aðstöðu og þjónustu. DAO þarf einnig að fylgjast með því að aðgengi að upplýsingum sé eins og best verður á kosið. DAO starfar í nánum tengslum við öryggisstjóra í aðdraganda leikja og á leikdegi eins og þörf er talin á.
Nánar um tengilið við fatlaða stuðningsmenn
