Leyfisferlið vegna tímabilsins 2021 hafið
Í samræmi við leyfisreglugerð KSÍ (útg. 4.2.) er þeim félögum sem hyggjast sækja um þátttökuleyfi í Pepsi Max deild karla og Lengjudeild karla árið 2021 hér með sendar nauðsynlegar upplýsingar, áður en vinna við leyfisumsókn hefst. Leyfisferlið vegna tímabilsins 2021 hófst formlega í gær þann 15.nóvember, líkt og ár hvert.Leyfisreglugerðin:
Í leyfisreglugerðinni er að finna allar nauðsynlegar upplýsingar um allar forsendur sem þarf að uppfylla og er félögum bent á að kynna sér reglugerðina vel. Leyfisumsækjandi verður að standa skil á öllum nauðsynlegum upplýsingum og/eða viðeigandi skjölum til að sýna fram á að allar skyldur séu uppfylltar sem leyfiskerfið hefur í för með sér til leyfisveitanda.
Leyfiskerfi kvenna (nýtt):
Á ársþingi KSÍ þann 22. febrúar 2020 var samþykkt að innleiða leyfiskerfi fyrir félög í efstu deild kvenna fyrir keppnistímabilið 2021. Tekur það leyfiskerfi mið af Leyfiskerfi UEFA sem gildir fyrir þátttöku í meistaradeild kvenna. Unnar hafa verið nauðsynlegar breytingar á leyfisreglugerð KSÍ svo leyfiskerfi í efstu deild kvenna geti formlega verið innleitt. Von er á að þær breytingar verði kynntar formlega síðar í þessum mánuði.
Leyfisfulltrúi:
Hvert félag tilnefnir einn leyfisfulltrúa. Leyfisfulltrúi félagsins er sá aðili sem leyfisstjóri KSÍ hefur að mestu samskipti við vegna leyfiskerfisins og er sá aðili sem allar upplýsingar eru sendar á. Leyfisfulltrúi félagsins kemur skilaboðunum síðan áfram innan síns félags.
Trúnaður:
KSÍ er bundið trúnaði gagnvart leyfisumsækjendum og er ekki heimilt að gefa óviðkomandi aðilum upp neinar upplýsingar úr leyfisgögnum leyfisumsækjenda, skv. trúnaðaryfirlýsingu þar um. Allir aðilar sem koma að leyfiskerfinu fyrir hönd KSÍ undirrita slíka trúnaðaryfirlýsingu.
Lykildagsetningar:
Skil á gögnum, öðrum en fjárhagslegum, eigi síðar en 15. janúar 2021.
Fjárhagslegum gögnum skilað eigi síðar en 20. febrúar 2021.
Ársreikningur 2020 verður því að vera staðfestur af stjórn leyfisumsækjanda og aðalfundi í síðasta lagi 20. febrúar 2021.
Beiting dagsekta:
Leyfisráð KSÍ vill koma því á framfæri til félaga í leyfiskerfinu að verði lykildagsetningar ekki virtar mun leyfisráð beina því til aga- og úrskurðarnefndar KSÍ að beita viðurlögum gagnvart viðkomandi félagi/félögum í samræmi við 14. reglugerðar KSÍ um aga- og úrskurðarmál.
Eftirfarandi viðurlögum er hægt að beita séu tímamörk ekki uppfyllt:
→ Viðvörun og sekt; við fyrsta brot skal beita dagsektum að upphæð kr. 2.500 fyrir hvern dag sem líður þangað til viðeigandi gögnum hefur verið skilað, að hámarki kr. 50.000.
→ Áminning og sekt; við ítrekað brot skal beita dagsektum að upphæð kr. 5.000 fyrir hvern dag sem líður þangað til viðeigandi gögnum hefur verið skilað, að hámarki kr.100.000.
→ Stigatap; við alvarlegt og ítrekað brot er jafnframt heimilt að draga allt að 3 stig frá félaginu í deildarkeppninni.
Leyfisdómur:
Rétt er að taka fram, ef til þess kemur að leyfisráð synji félagi um þátttökuleyfi t.d. vegna ófullnægjandi gagnaskila, þá er hlutverk leyfisdóms við áfrýjun einungis að endurmeta hvort ákvörðun leyfisráðs hafi verið rétt eða röng miðað við fyrirliggjandi gögn. Það þýðir að félög gætu t.d. ekki bætt úr ófullnægjandi gagnaskilum fyrir leyfisdómi ef til þess kæmi.
Fjárhagsleg leyfisgögn:
Félög í Pepsi Max deild karla þurfa fulla áritun endurskoðanda á ársreikning sinn. Félög í Lengjudeild karla þurfa könnunaráritun endurskoðanda á ársreikning sinn (athugið þó reglur um fjárhagslega háttvísi). Félög eru minnt á staðfestingar vegna engra vanskila við leikmenn, þjálfara og aðra, sem og staðfestingar vegna engra vanskila vegna félagaskipta leikmanna.
Leyfisvefurinn á ksi.is og tækjakassi:
Á vef KSÍ má finna allar helstu upplýsingar, eyðublöð og gátlista, reglugerðina sjálfa, o.s.frv. Nálgast má nauðsynleg gögn og sniðmát vegna umsóknar um þátttökuleyfi á tækjakassa leyfiskerfsins. Athugið að þar er alltaf að finna nýjustu útgáfu. Félög þurfa að gæta þess að nota ekki úreltar útgáfur skjala og nauðsynlegra staðfestinga.
Aðstoð á skrifstofu KSÍ:
Leyfisstjóri verður til taks á skrifstofu KSÍ ef spurningar vakna. Hlutverk leyfisstjóra í er að halda utan um kerfið og aðstoða félögin við að útbúa leyfisumsókn. Ef leyfisstjóri kemur auga á eitthvað sem hann telur að gæti komið í veg fyrir veitingu þátttökuleyfis mun hann vinna með viðkomandi félagi að úrlausn málsins. Óskað er eftir að öllum fyrirspurnum sem ætlað er að beina til leyfisstjóra í tölvupósti verði send á vefpóst leyfiskerfisins: leyfiskerfi@ksi.is
Rafræn gagnaskil:
Óskað eftir því að félög skili öllum gögnum rafrænt í gegnum vefforritið Microsoft TEAMS. Forritið virkar þannig að hvert og eitt félag í leyfiskerfinu fær aðgang að sérstöku vefsvæði þar sem tilskyldum gögnum skal hlaðið upp. Einungis leyfisfulltrúar viðkomandi félags, leyfisstjóri og endurskoðendur á hans vegum hafa aðgang að vefsvæði hvers félag. Óskað er eftir því að hvert félag sendi til leyfisstjóra tölvupóstfang/email þeirra sem eiga að hafa aðgang að vefsvæði félagsins vegna skila á leyfisgögnum. Leyfisstjóri mun í framhaldinu veita viðkomandi aðilum aðgang.
.jpg?proc=760)
