Reglur KSÍ um sóttvarnir hafa verið staðfestar

Fyrr í dag, 13. ágúst samþykkti stjórn KSÍ nýja reglugerð KSÍ um framkvæmd æfinga og leikja. Sú reglugerð, ásamt reglum sem tilgreindar eru í fylgiskjali, hefur nú verið staðfest af ÍSÍ og heilbrigðisyfirvöldum og leikir í knattspyrnu geti því hafist að nýju skv. fyrirliggjandi dagskrá sem birt hefur verið hér á vef KSÍ.

Reglugerðin, ásamt reglunum sjálfum og ýmsum fylgigögnum hefur nú verið birt hér á vef KSÍ og eru allir hagsmunaaðilar hvattir til að kynna sér vel efni þessarar síðu.

Markmið reglnanna er að tryggja að umgjörð leikja og æfinga í knattspyrnu verði með þeim hætti að hægt sé að halda áfram að leika knattspyrnu á Íslandi þrátt fyrir að COVID-19 sé enn við lýði í íslensku samfélagi og útlit fyrir að svo kunni að verða áfram næstu misseri.

Efst hér á þessari síðu er meðal annars eyðublað sem öll félög þurfa nú að fylla út sem allra fyrst og senda til KSÍ á covid19@ksi.is. Einnig er þarna að finna gátlista fyrir sóttvarnarfulltrúa og reglugerð þá sem stjórn KSÍ staðfesti fyrr í dag.

Töluverður fjöldi spurninga hefur borist KSÍ undanfarna daga. Meðal efnis hér á vefnum verða helstu spurningar og svör þar sem allar spurningarnar eru birtar ásamt svörum við þeim. Allir sem hafa spurningar ættu að leita fyrst að svörum hér á vefnum og ef spurningunni hefur ekki þegar verið svarað þá er um að gera að senda frekari fyrirspurnir til KSÍ á netfangið covid19@ksi.is 

Allir hagsmunaaðilar; leikmenn, forráðamenn félaga, starfsmenn félaga og mannvirkja, dómarar, fjölmiðlar og allt áhugafólk um knattspyrnu, þurfa nú að snúa bökum saman og sýna að við erum traustsins verð. Við skulum ekki efast um það eina einustu mínútu að samfélagið allt horfir til okkar og fylgist með því hvernig tekst til að framfylgja þessum reglum.

Með sameiginlegu átaki allra hagsmunaaðila getum við tryggt að hægt sé að stunda knattspyrnu áfram þó að takmarkanir séu miklar.

• COVID-19
• Mótamál