Heiðursgestir á úrslitaleik Mjólkurbikars kvenna
Björn Ingi Gíslason, Selfossi, og Ásta Jónsdóttir, KR, verða heiðursgestir liðanna á úrslitaleik Mjólkurbikars kvenna á laugardaginn. Bæði hafa verið mikilvægur hlekkir í sjálfboðaliðastarfi félaganna í gegnum árin.
Leikurinn fer fram á Laugardalsvelli laugardaginn 17. ágúst og hefst kl. 17:00.
Hægt er að skoða upplýsingar um leikinn á sérstakri síðu hér á heimasíðu KSÍ.
Síða úrslitaleiks Mjólkurbikars kvenna
Selfoss
Björn Ingi Gíslason, heiðursfélagi í knattspyrnudeild Selfoss, verður heiðursgestur Selfoss á bikarúrslitaleik Mjólkurbikars kvenna. Hann á að baki glæsilegan feril fyrir knattspyrnudeild Selfoss. Hvort sem það er sem leikmaður, þjálfari, dómari, stjórnarmaður, foreldri og nú seinast sem afi á hliðarlínunni, þá er hann ávallt mættur að hvetja lið Selfoss áfram.
Björn tók við formennsku hjá knattspyrnudeild Selfoss árið 1966 og sat í 16 ár í stjórn hennar, þar af í 13 ár sem formaður. Björn og fjölskylda hans hafa unnið ómetanlegt starf á öllum sviðum fyrir knattspyrnudeild Selfoss í gegnum tíðina.
Hér er Björn með barnabarni sínu, Barbáru Sól Gísladóttur, en hún er einmitt leikmaður meistaraflokks kvenna hjá Selfoss og verður án efa í sviðsljósinu í bikarúrslitaleiknum.
KR
Ásta Jónsdóttir hefur verið viðloðandi KR í yfir 40 ár. Hún sá um tíma um búningaþvott KR og þvoði búninga margra flokka í einu. Hún tók við starfi liðstjóra yngri flokka kvenna í knattspyrnu árið 1989 og meistaraflokks kvenna 1991 og sinnti því starfi með miklum sóma í mörg ár. Hún ásamt fjölskyldu sinni tóku þátt í öllum þeim fjáröflunum sem þau komust yfir fyrir félagið. Það sjálfboðastarf sem Ásta hefur unnið fyrir félagið er ómetanlegt og án slíkra stuðningsmanna væri erfitt að halda út íþróttastarfsemi í félögum sem treysta á aðstoð sjálfboðaliða.
Það er varla leikur, bæði hjá fótboltanum og öðrum deildum innan KR þar sem ekki má sjá hana og fleiri úr fjölskyldu hennar að styðja sitt fólk. KR er mjög stolt og afar þákklát fyrir það starf sem Ásta hefur sinnt af mikilli alúð fyrir KR.
