Ólöglegur leikmaður hjá KR gegn HK/Víkingi í Reykjavíkurmóti kvenna
Skrifstofa KSÍ hefur staðfest að KR tefldi fram ölöglegu liði gegn HK/Víkingi í leik í Reykjavíkurmóti meistaraflokks kvenna, sem fram fór 13. janúar síðastliðinn. Úrslitum leiksins er því breytt, í samræmi við grein 40.1 í reglugerð KSÍ um knattspyrnumót, og HK/Víkingi dæmdur sigur.
Úr ábendingum sem sendar voru til þátttakenda í Reykjavíkurmóti meistaraflokks:
Félag, sem notar leikmann sem ekki hefur keppnisleyfi með því eða notar leikmann, þjálfara eða forystumann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Staðfesti skrifstofa KSÍ að þátttakandi hafi verið óhlutgengur í leik skal mótanefnd þegar í stað skrá úrslit leiksins skv. ofangreindu og tilkynna það viðkomandi félögum. Heimilt er að kæra slíka skráningu til aga- og úrskurðarnefndar KSÍ og skal kærufrestur telja frá þeim degi sem tilkynningin er gefin út. Viðkomandi félög verða sektuð samkvæmt reglugerð KSÍ um knattspyrnumót.
Samkvæmt reglum KSÍ um knattspurnumót segir í grein 40.1:
Lið, sem mætir ólöglega skipað til leiks og félag sem notar leikmann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Félag sem notar þjálfara eða forystumann sem er í leikbanni skal sæta sektum og viðkomandi frekara leikbanni í samræmi við ákvörðun aga- og úrskurðarnefndar. Lið, sem mætir ólöglega skipað til leiks, skal sæta sekt að upphæð allt að kr. 50.000. Félag, sem notar leikmann, þjálfara eða forystumann í leikbanni, skal sæta sektum að upphæð allt að kr. 300.000 sé brotið framið í meistaraflokki. Sé brotið framið í öðrum flokkum skal sektin vera allt að kr. 50.000.
Neðangreindur leikmaður lék ólöglegur með KR
Leikur:
KR - HK/Víkingur
Dagsetning:
13. janúar 2019
Nafn leikmanns:
Sigríður Kristjánsdóttir, lék með KR, skráð í Gróttu.
Í samræmi við ofangreinda reglugerð eru úrslit leiksins skráð 0-3 og KR er sektað um kr. 25.000.-.
