mán. 19. nóv. 2018
Leyfiskerfi

Leyfisferlið fyrir 2019 er hafið

Mynd: Fótbolti.net - Hafliði Breiðfjörð

Í samræmi við leyfisreglugerð KSÍ (útg. 4.1.) hefur þeim félögum sem hyggjast sækja um þátttökuleyfi í Pepsi-deild karla og Inkasso-deild karla árið 2019 verið sendar nauðsynlegar upplýsingar, áður en vinna við leyfisumsókn hefst. Leyfisferlið hefst formlega 15.nóvember ár hvert.

Leyfisreglugerðin

Í leyfisreglugerðinni er að finna allar nauðsynlegar upplýsingar um allar forsendur sem þarf að uppfylla og er félögum bent á að kynna sér reglugerðina vel. Leyfisumsækjandi verður að standa skil á öllum nauðsynlegum upplýsingum og/eða viðeigandi skjölum til að sýna fram á að allar skyldur séu uppfylltar sem leyfiskerfið hefur í för með sér til leyfisveitanda.

Leyfisfulltrúi

Hvert félag tilnefnir einn leyfisfulltrúa. Leyfisfulltrúi félagsins er sá aðili sem leyfisstjóri KSÍ hefur að mestu samskipti við vegna leyfiskerfisins og er sá aðili sem allar upplýsingar eru sendar á. Leyfisfulltrúi félagsins kemur skilaboðunum síðan áfram innan síns félags.

Trúnaður

KSÍ er bundið trúnaði gagnvart leyfisumsækjendum og er ekki heimilt að gefa óviðkomandi aðilum upp neinar upplýsingar úr leyfisgögnum leyfisumsækjenda, skv. trúnaðaryfirlýsingu þar um. Allir aðilar sem koma að leyfiskerfinu fyrir hönd KSÍ undirrita slíka trúnaðaryfirlýsingu.

Lykildagsetningar

Skil á gögnum, öðrum en fjárhagslegum, eigi síðar en 15. janúar.
Fjárhagslegum gögnum skilað eigi síðar en 20. febrúar.
Ársreikningur verður því að vera staðfestur af stjórn leyfisumsækjanda og aðalfundi í síðasta lagi 20. febrúar.

Fjárhagsleg leyfisgögn:

Félög í Pepsi-deild karla þurfa fulla áritun endurskoðanda á ársreikning sinn. Félög í Inkasso-deild karla þurfa könnunaráritun endurskoðanda á ársreikning sinn (athugið þó reglur um fjárhagslega háttvísi). Félög eru minnt á staðfestingar vegna engra vanskila við leikmenn, þjálfara og aðra, sem og staðfestingar vegna engra vanskila vegna félagaskipta leikmanna.

Aðstoð á skrifstofu KSÍ:

Leyfisstjóri verður til taks á skrifstofu KSÍ ef spurningar vakna. Hlutverk leyfisstjóra í er að halda utan um kerfið og aðstoða félögin við að útbúa leyfisumsókn. Ef leyfisstjóri kemur auga á eitthvað sem hann telur að gæti komið í veg fyrir veitingu þátttökuleyfis mun hann vinna með viðkomandi félagi að úrlausn málsins. Óskað er eftir að öllum gögnum og öllum fyrirspurnum sem ætlað er að beina til leyfisstjóra í tölvupósti verði send á vefpóst leyfiskerfisins: leyfiskerfi@ksi.is

Skjöl á leyfisvefnum:

Öll nauðsynleg skjöl og sniðmát er að finna á leyfisvefnum á ksi.is, undir Tækjakassi. Heiti skjalanna eru hluti af skjalastýringu leyfiskerfisins og á sumum stöðum í gátlista yfir allar forsendur má sjá tilvísanir í ákveðin skjöl. Þessi skjöl má sækja á leyfisvefinn. Athugið að þar er alltaf að finna nýjustu útgáfu. Félög þurfa að gæta þess að nota ekki úreltar útgáfur skjala og nauðsynlegra staðfestinga.