Göngubolti kynntur í Grasrótaviku UEFA
Grasrótarvika UEFA hefst sunnudaginn 23. september nk. í tengslum við Íþróttaviku Evrópu (European Week of Sport) og stendur til 30. september. Af því tilefni ætlar KSÍ, í samstarfi við Knattspyrnufélagið Þrótt í Reykjavík, að bjóða upp á kynningu á því sem kallast heilsubolti, eða göngubolti. Þróttur hefur undanfarin misseri haldið úti öflugu starfi á þessu sviði, þar sem fólk á besta aldri hittist, spilar og hefur gaman. Kynningin verður sunnudaginn 23. september og hefst hún kl. 13:30 á Eimskipsvellinum hjá Þrótti. Öllum er velkomið að koma og prófa, karlar, konur, ungir sem aldnir.
Heilsubolti hefur verið að ryðja sér til rúms víðsvegar í Evrópu að undanförnu og nýtur mikilla vinsælda víða um álfuna. Markmið heilsuboltans er einfalt, að gefa fólki kost á að spila fótbolta eins lengi og mögulegt er - skemmtileg og heilsusamleg hreyfing fyrir líkama og sál.
Fyrr þennan sama dag, 23. september, fara fram Íslandsleikar Special Olympics, einnig á Þróttarvellinum og hefjast þeir kl. 10:00. KSÍ hvetur fólk til að mæta á þann viðburð og hvetja fótboltakempurnar sem þar leika listir sínar áfram.
Fyrr í sumar hittist hópur fólks á Eimskipsvellinum hjá Þrótti og var ekki annað að sjá en allir hafi haft gaman af gönguboltanum.
Grunnreglur leiksins eru mjög einfaldar:
- Bannað er að hlaupa. Leikmaður verður að hafa annan fótinn á jörðinni.
- Það er engin rangstaða.
- Sóknarmenn mega ekki fara innfyrir vítateig (aukaspyrna).
- Varnarmenn mega ekki fara innfyrir eigin vítateig (vítaspyrna).
- Markvörður má ekki fara útfyrir vítateig (vítaspyrna).
- Rennitæklingar eru með öllu bannaðar.
- Allar aukaspyrnur eru óbeinar.
- Markvörður verður að spyrna frá marki eða kasta með "undir arm" kasti.
- Lið mega vera kynja og -aldursblönduð.
KSÍ og Special Olympics vonast til að sjá sem flesta á svæðinu - til að taka þátt eða fylgjast með og taka þátt í gleðinni.
.jpg?proc=760)
