Parkinsdóttir: Samstarfsverkefni KSÍ og Parkinson-samtakanna
KSÍ gekk fyrr á árinu til samstarfs við Parkinsonsamtökin um kynningar- og fjáröflunarverkefni fyrir sérstakt Parkinsonsetur sem verður fyrsta sinnar tegundar á Íslandi, þar sem boðið verður upp á fræðslu, ráðgjöf, stuðning og þjálfunaraðstöðu fyrir fólk með Parkinson og aðstandendur þeirra. Í Parkinsonsetrinu verður einnig dagvist með sérhæfðri endurhæfingu fyrir fólk með langt genginn Parkinsonsjúkdóm, en það er gríðarlega mikil þörf á þeirri þjónustu. KSÍ leggur þessu þarfa verkefni lið með því að taka virkan og öflugan þátt í árveknisátaki um verkefnið og Parkinsonsjúkdóminn.
Fyrir leikinn við Þýskaland munu 11 Parkinson sjúklingar stilla sér upp úti á velli og verða þar þegar keppnisliðin ganga út. Á meðan þjóðsöngvar verða leiknir standa 11 Parkinson sjúklingar við hlið 11 leikmanna í byrjunarliði Íslands og undir íslenska þjóðsöngnum stendur þessi 22 manna röð öxl við öxl. Á meðan keppnisliðin heilsast færa Parkinson sjúklingarnir sig saman að hliðarlínu þar sem liðsmyndin verður tekin – 11 leikmenn í byrjunarliði Íslands stilla sér upp með þeim (Parkinson í aftari röð, leikmenn í fremri röð) og liðsmyndin úr þessum leik verður þannig af 22 einstaklingum. Undir þjóðsöngnum munu Parkinson sjúklingarnir klæðast sérmerktum landsliðstreyjum, en leikmennirnir munu klæðast sérmerktum peysum. Á bakinu verður áprentað „Parkinsdóttir“ og númerið 2 (Ísland er í 2. sæti yfir hæstu dánartíðni vegna Parkinson í heiminum). Sams konar verkefni var unnið í tengslum við vináttuleik A landsliðs karla gegn Gana fyrr í sumar.
HVAÐ ER PARKINSON?
Parkinson er taugahrörnunarsjúkdómur sem hefur áhrif á þær taugafrumur í heilanum sem stjórna hreyfingu. Einkenni sjúkdómsins byrja hægt en ágerast smám saman eftir því sem tíminn líður. Sjúkdómurinn er nefndur eftir enska lækninum James Parkinson sem greindi fyrst frá einkennum sjúkdómsins árið 1817.
Um það bil 10 milljónir manna eru greindir með Parkinsonsjúkdóminn um allan heim. Á Íslandi eru um 700 manns með Parkinson en gert er ráð fyrir að fjöldi Parkinsongreindra í í Evrópu muni tvöfaldast til ársins 2030 og verði þá um 1.400 hér á landi (vegna fjölda fólks sem er að komast upp á 60 ára+ aldur og vegna lengri lífaldurs almennt). Flestir sem greinast með sjúkdóminn eru yfir 60 ára en einn af hverjum tíu eru undir 50 ára aldri við greiningu. Talsvert fleiri karlar en konur frá sjúkdóminn. Ísland er í 2. sæti yfir hæstu dánartíðni vegna Parkinson í heiminum og Parkinson er 2. sæti yfir algengustu taugasjúkdóma í heiminum á eftir Alzheimer.
Parkinsonsjúkdómurinn er mjög persónubundinn og engir tveir upplifa nákvæmlega sömu einkennin en þau geta líka þróast á mismunandi hátt. Einkennin geta verið breytileg dag frá degi og á mismunandi tímum sólarhringsins. Augljósustu einkenni Parkinsonsjúkdómsins eru tengd hreyfingu eins og skjálfti, vöðvastífleiki og hægar hreyfingar. Önnur einkenni sem tengjast ekki hreyfingu geta haft mikil áhrif á lífgæði. Helstu einkennin sem ekki tengjast hreyfingu eru svefntruflanir, verkir og þreyta og andleg vanlíðan eins og þunglyndi og kvíði.
Enn sem komið er er ekki vitað hvað veldur parkinsonsjúkdómnum og það er ekki til nein lækning við en það eru margt hægt að gera til auka lífsgæði. Með mikilli hreyfingu og jákvæðu hugarfari virðist vera hægt að hægja á einkennum sjúkdómsins og það hjálpar fólki að vera áfram við stjórnvölinn í eigin lífi.
