mið. 13. jún. 2018
Fundargerðir

2207. fundur stjórnar KSÍ - 2. júní 2018

Mættir: Guðni Bergsson formaður, Guðrún Inga Sívertsen, Borghildur Sigurðardóttir, Magnús Gylfason, Ingi Sigurðsson, Ragnhildur Skúladóttir, Valgeir Sigurðsson og Vignir Már Þormóðsson.

Mættir varamenn: Ingvar Guðjónsson, Jóhann Torfason, Kristinn Jakobsson

Mættir landshlutafulltrúar: Tómas Þóroddsson, Jakob Skúlason, Bjarni Ólafur Birkisson og Björn Friðþjófsson.

Þá sat Klara Bjartmarz framkvæmdastjóri fundinn og ritaði fundargerð.

Fjarverandi: Gísli Gíslason

Þetta var gert:

1. Fundargerð síðasta fundar

Fundargerð síðasta fundar var þegar samþykkt rafrænt.

2. Fundargerðir nefnda voru lagðar fram til kynningar.

3. Heimsóknir til aðildarfélaga

Rætt var um heimsóknir til aðildarfélaga en gert er ráð fyrir að fyrstu heimsóknir verði í næstu viku.

4. Málefni Laugardalsvallar

Guðni Bergsson formaður fór yfir stöðu mála varðandi Laugardalsvöll. Stjórn samþykkti að skipa eftirtalda í rýnihóp varðandi framtíð Laugardalsvallar; Guðrún Inga Sívertsen, Borghildur Sigurðardóttir, Gísli Gíslason og tveir fulltrúar mannvirkjanefndar.

5. Landsliðsmál

U19 ára landslið kvenna fer til Póllands á morgun og leikur þar í milliriðlum EM. Lítið svigrúm er til æfinga fyrir ferð vegna leikja innanlands. Rætt um hvenær íslensku landsliðin koma á leikstað samanborið við mótherja okkar. Þá var rætt um mikilvægi þess að gefa leikmönnum tækifæri til að sinna lærdómi og hvetja þá til að sinna námi sínu í ferðum. Á síðasta fundi unglinganefndar kvenna lagði nefndin til að Þórður Þórðarson landsliðsþjálfari U19 kvenna og Jörundur Áki Sveinsson landsliðsþjálfari U17 kvenna verði endurráðnir þjálfarar liðanna.

A karla leikur vináttuleik gegn Noregi í kvöld. Á fimmtudaginn er síðasti leikur fyrir HM en þá verður leikið gegn Gana. Undirbúningur fyrir leikina og úrslitakeppni HM gengur vel.

A kvenna leikur gegn Slóveníu 11. júní í undankeppni HM og er leikurinn ákaflega mikilvægur.

6. HM 2026

Eftir kynningu formanns ræddi stjórn um þá tvo mótshaldara sem valið stendur á milli, þ.e. annars vegar Marokkó og hins vegar sameiginlegt boð Bandaríkjanna, Kanada og Mexíco. Aðildaþjóðir FIFA kjósa milli mótshaldarana á ársþingi FIFA sem fram fer í Moskvu 13. júní næstkomandi. Fyrir þingið verður Norðurlandafundur þar sem farið verður betur yfir umsóknirnar.

Stjórn KSÍ samþykkti að fulltrúar KSÍ á FIFA þinginu, þau Guðni Bergsson formaður, Guðrún Inga Sívertsen varaformaður og Klara Bjartmarz framkvæmdastjóri taki ákvörðun í málinu í framhaldi af Norðurlandafundinum.

7. Mótamál

Vignir Már Þormóðsson formaður mótanefndar fór yfir stöðuna í mótamálum.

Fulltrúar Mótanefndar, Vignir Már Þormóðsson, Ingvar Guðjónsson og Birkir Sveinsson funduðu í gær með fulltrúum ÍTF, þeim Haraldi Harldssyni og Þóri Hákonarsyni, þar sem m.a. var fjallað um keppnisfyrirkomulag í Lengjubiknum ofl. Einnig var rætt um félagaskiptagluggann sem hefur verið óbreyttur um langt skeið á meðan tímabilið hefur færst framar. Stjórn er sammála því að þetta sé vandmeðfarið mál sem þurfi m.a. að ræða á ársþingi.

Stjórn KSÍ samþykkti að í haust verði hafin athugun á því hvort að rétt sé að endurskoða félagaskiptagluggan á Íslandi.

Rætt um forsendur fyrir frestunum leikja, bæði veðurfarslegar og aðrar
Rætt um fyrirspurn sem barst á síðasta stjórnarfund um fjölda leikja í Faxaflóamóti. Sérstök mótanefnd fjallar um þau mál en ekki mótanefnd KSÍ.

8. Dómaramál

Kristinn Jakobsson formaður dómaranefndar fór yfir stöðunar í dómaramálum. Í framhaldi af úrslitakeppni EMU17 karla var Vilhjálmur Alvar hækkaður um styrkleikaflokk hjá UEFA.

FIFA hefur gefið út ný knattspyrnulög og vinnur Gylfi Þór Orrason að íslenskri þýðingu.

Rætt um marklínutæknina.

Mönnun leikja gengur vel hjá starfsmönnum dómaramála.

9. Önnur mál

Landshlutafulltrúar fóru yfir stöðuna á sínum svæðinu, m.a. vallaraðstæður og stöðu yngri flokka. Útbreiðslunefnd er að kortleggja stöðuna á landsbyggðinni til að beina aðstoð til þeirra svæða sem mest þurfa. Endurgreiðsla á VSK gæti skipt sköpum fyrir félögin.

Valgeir Sigurðsson óskaði eftir því að verkefnastjóri markaðsmála efstu deilda taki saman stöðuskýrslu hvað varðar aðgerðir aðildarfélaga, KSÍ og rétthafa. Framkvæmdastjóri ræðir við verkefnastjóra.

Rætt um fyrirspurn frá ÍTF um hlutdeild í samningum við bakhjarla. Formaður mun senda ÍTF skriflegt svar.

Tilraunir formanns að ná sáttum í málum Ólafs Jóhannessonar og Víkings hafa enn ekki skilað árangri.

Björn Friðþjófsson ræddi um veðmál í íslenskri knattspyrnu. Starfshópur um veðmál hefur skilað gögnum til Laga-og leikreglnanefndar sem þarf að skoða breytingar á reglugerðum í því sambandi.

Fleira var ekki bókað og var fundi slitið kl. 14:45