mið. 30. maí 2018
Fræðsla

Útbreiðslunefndin í Ólafsvík

Nýverið stóð Víkingur Ólafsvík fyrir fótboltaveislu. Veislan fór fram í íþróttamiðstöðinni í Ólafsvík en Víkingar taka í notkun nýtt fótboltagras á aðalvelli félagsins á næstu dögum. Boðið var upp á ýmsa skemmtilega hluti, s.s. leiktæki, fótbolta-skot skífu og óhætt er að segja að veislan hafi verið vel sótt af fjölda barna og fullorðinna.

Valgeir Sigurðsson, formaður útbreiðslunefndar, og Jakob Skúlason, fulltrúi vesturlands í útbreiðslunefnd, sóttu Ólsara heim í tilefni dagsins og fengu þeir höfðinglegar móttökur hjá heimamönnum. Kristinn Jónasson, bæjarstjóri Snæfellsbæjar, fór m.a. með þá félaga út á framkvæmdasvæði og upplýsti um þær framkvæmdir sem standa yfir á aðalvelli félagsins. Ljóst er að þessi breyting mun vera mikil lyftistöng fyrir fótboltann á Snæfellsnesinu bæði fyrir yngri iðkendur og þá eldri.

Alls eru iðkendur í knattspyrnu í Snæfellsbæ 184 talsins, en bæjarbúar eru 1.641. Þrátt fyrir að rúmlega 11% bæjarbúa stundi knattspyrnu, þá hafa heimamenn mikinn áhuga á að auka þátttöku barna af erlendum uppruna í knattspyrnu. Samkvæmt Þorsteini Hauki Harðarsyni framkvæmdastjóra eru einungis 14% barna af erlendum uppruna sem stunda íþróttir eða annað forvarnarstarf á svæðinu.

Knattspyrnusamband Íslands óskar Víkingi Ólafsvík til hamingju með vel heppnaða fótboltaveislu og þakkar fyrir höfðinglegar móttökur.