• fös. 25. maí 2018
  • Fundargerðir

2206. fundur stjórnar KSÍ - 17. maí 2018

Mættir:  Guðni Bergsson formaður, Guðrún Inga Sívertsen, Borghildur Sigurðardóttir, Magnús Gylfason, Gísli Gíslason, Ingi Sigurðsson, Ingvar Guðjónsson, Jóhann Torfason, Kristinn Jakobsson, Ragnhildur Skúladóttir, Valgeir Sigurðsson og Vignir Már Þormóðsson. 

Þá sat Klara Bjartmarz framkvæmdastjóri fundinn og ritaði fundargerð.   

Þetta var gjört:  

  1. Fundargerð síðasta fundar
    • Fundargerð síðasta fundar var þegar samþykkt rafrænt.

  2. Fundargerðir nefnda voru lagðar fram til kynningar.  
    • Dómaranefnd 17. apríl 2018
    • Mótanefnd 27. apríl 2018
    • Útbreiðslunefnd 27. apríl 2018
    • Unglinganefnd karla 8. maí 2018  
    • Unglinganefnd kvenna 15. maí 2018;  Ragnhildur Skúladóttir formaður nefndarinnar fylgdi úr hlaði tillögu unglinganefndar kvenna að fjölga starfsmönnum um einn í landsliðsferðum yngri landsliða (leikgreinanda/fitness þjálfara).  Einnig var rætt um 20 leikmenn á skýrslu (sbr. UEFA leikir yngri landsliða).  Frekari umræðu og ákvörðun í málinu var frestað.  
    • Fræðslunefnd 16. maí 2018
    • Laga-og leikreglnanefnd 17. maí 2018 
    • Mannvirkjanefnd 17. maí 2018

  3. Gísli Gíslason, formaður laga-og leikreglnanefndar kynnti niðurstöður nefndarinnar hvað varðar reglugerðir:
    • Nefndin leggur til breytingar á reglugerð KSÍ um aðgönguskírteini, annars vegar hvað varðar lágmarksfjölda dæmdra leikja til að fá útgefið skírteini og hins vegar útgáfu skírteina fyrir 2. deild kvenna.  Ákveðið var að leita umsagnar ÍTF á fyrri breytingartillögunni áður  en lengra er haldið.
    • Nefndin beinir þeim tilmælum til stjórnar að fjárhagsnefnd verði falið að endurskoða reglugerð KSÍ um ferðaþátttökugjöld í ljósi þeirra reynslu sem fengist hefur á reglugerðinni.  Stjórn samþykkti tillögu laga-og leikreglnanefndar.

  4. Heimsóknir til aðildarfélaga
    • Framkvæmdastjóri kynnti tillögu að fyrirkomulagi heimsókna til aðildarfélaga.  Tillagan var samþykkt og stefnt er að því að hefja heimsóknir til aðildarfélaga strax í maí.

  5. Úrskurður áfrýjunardómstóls KSÍ í máli Vals gegn KSÍ.
    • Framkvæmdastjóri kynnti gögn málsins.  Formaður sambandsins, Guðni Bergsson, mun leita sátta í málinu.

  6. Fjármál 
    • Framkvæmdastjóri kynnti 3ja mánaða uppgjör sambandsins.  Allir rekstrarliðir eru undir eða á ætlun nema skrifstofu og stjórnunarkostnaður.  Sá liður er 2% yfir áætlun sem skýrist af því að kostnaður vegna ársþings og endurskoðunar vegur mest á þessu tímabili.  Tekjur eru yfir eða á áætlun fyrir utan FIFA og Getraunir.  Skýringar á því eru m.a. að greiðslur frá FIFA vegna HM koma ekki fyrr en eftir HM og tekjur frá Getraunum koma seinni part ársins.
    • Þá kynnti framkvæmdastjóri yfirlit yfir raunkostnað landsliða gagnvart áætlun.  Áætlun fyrir janúar-mars gerði ráð fyrir kostnaði upp á 122.452.500 en raunkostnaður er 122.085.330 eða -0.30% undir áætlun. 
    • Stjórn lýsti yfir ánægju með störf fjármálastjóra og uppgjörsgögn.
    • Gjaldkeri stjórnar, Borghildur Sigurðardóttir, fór yfir þær reglur sem voru samþykktar í stjórn í fyrra varðandi samþykkt kostnaðar, ferðir landsliða og aðrar ferðir á vegum KSÍ. 
       
  7. Markaðsmál
    • Guðni Bergsson fór yfir samninga sambandsins og tekjuskiptingu KSÍ.  Markmið fjárhagsáætlunar hafa þegar náðst og lýsti stjórn yfir ánægju með það.  Rætt um hvort rétt sé að nota fleiri mælikvarða á vinsældir knattspyrnunnar en talningu áhorfenda.  

  8. Skipan starfshópa stjórnar
    • Stjórn samþykkti eftirfarandi starfshópa stjórnar (fyrsti í upptalningu leiðir viðkomandi hóp):
      • Virðisaukaskattur:  Guðrún Inga Sívertsen, Guðni Bergson, Ingi Sigurðsson, Jónas Gestur Jónsson og Jónas Þórhallsson
      • Ferðakostnaður:  Ingi Sigurðsson, Jóhann K Torfason, Vignir Már Þormóðsson, Gísli Gíslason, Guðni Bergsson, Bjarni Ólafur Birkisson og Ívar Ingimarsson
      • Heimsóknir til aðildarfélaga:  Klara Bjartmarz, Guðrún Inga Sívertsen, Ragnhildur Skúlasdóttir og tilkallaðir stjórnarmenn og starfsmenn
      • Samtal við ÍTF:  Valgeir Sigurðsson, Guðni Bergsson, Klara Bjartmaz, Magnús Gylfason og tilkallaðir stjórnarmenn

  9. Málefni Laugardalsvallar
    • Guðni Bergsson formaður fór yfir stöðu mála varðandi Laugardalsvöll en verið er að ganga frá stofnun undirbúningsfélags hjá Ríki og Borg. Stjórn samþykkti að Guðni Bergsson formaður verði fulltrúi KSÍ í undirbúningsfélaginu.  Þá samþykkti stjórn einnig tillögu Gísla Gíslasonar um að skipa rýnihóp til að starfa með formanni að málinu.  Skipan í rýnihóp var frestað.

  10. Landsliðsmál 
    • Tveir landsleikir fóru fram frá síðasta stjórnarfundi, U15 karla lék tvo leiki gegn Sviss.  Fyrri leiknum lauk með 4-1 sigri Sviss, en sá síðari 3-1 fyrir Sviss.  Leikirnir fóru fram á Eimskipsvellinum í umsjón Þróttar og lýsti stjórn yfir ánægju sinni með umgjörðina hjá Þrótti.
    • Framkvæmdastjóri fór yfir stöðuna í undirbúningi fyrir HM.  Undirbúningur er á áætlun en framundan eru annasamar lokavikur.  

  11. Mótamál  
    • Vignir Már Þormóðsson formaður mótanefndar fór yfir stöðuna í mótamálum.  Vallarvandamál hafa einkennt byrjun mótsins, til dæmis  hafa fáir leikir farið fram á grasvöllum í Reykjavík.  Rætt um þá leiki sem hafa farið fram í Egilshöll og færslu leiks Fjölnis og FH í Egilshöll.  Mótanefnd mun fjalla sérstaklega um það mál á næsta fundi nefndarinnar.    
    • Rætt um frestun leikja í Pepsi-deild karla í kvöld.  Tveimur leikjum var frestað en þar komust félögin að samkomulagi um frestun. Ekki náðist samkomulag milli FH og KA um frestun á leik félaganna og hófst sá leikur á réttum tíma. 
    • Rætt um fjölda leikja drengja annars vegar og stúlkna hinsvegar í Faxaflóamótinu.  Mótanefndar skoðar málið milli funda. 
    • Í framhaldi af umræðu á síðasta stjórnarfundi staðfesti stjórn útreikninga og fyrirkomulag  ferðaþátttökugjalds vegna yfirstandandi tímabils.
       
  12. Dómaramál 
    • Kristinn Jakobsson formaður dómaranefndar fór yfir það sem efst er á baugi í dómaramálum sambandsins.  Vilhjálmur Alvar Þórarinsson stóð sig vel í úrslitakeppni EMU17 karla og dæmdi m.a. undanúrslitaleikinn.
    • Niðurröðun gengur ágætlega, en framundan er stór helgi sem kallar á marga dómara.  
    • Rætt um viðurlög UEFA og FIFA við óviðeigandi hegðun leikmanna og forráðamanna og hvernig þessum viðurlögum er beitt á Íslandi.  

  13. Önnur mál 
    • Lagt fram bréf frá Einherja vegna úthlutunar úr mannvirkjasjóði.  Stjórn samþykkti að skoða málið aftur í haust.  
    • Klara Bjartmarz framkvæmdastjóri kynnti rýmisbreytingar á skrifstofu.  Stjórn lýsti yfir ánægju um nýtt fyrirkomulag afgreiðslu KSÍ, þ.e. að hafa afgreiðsluna mannaða.   
    • Rætt um greiðslur til aðildarfélaga vegna HM.  Samþykkt að byggja úthlutun á vinnu starfshóps sem skipaður var vegna EM2016. Samþykkt að skipa Gísla Gíslason, Björn Friðþjófsson, Guðrún Ingu Sívertsen, Valgeir Sigurðsson og Vigni Már Þormóðsson í starfshóp um HM úthlutun.  Ennfremur var samþykkt að Gísli leiði hópinn.  Miðað er við að greitt verði til aðildarfélaga næsta haust/vetur en ekki er von á greiðslu frá FIFA fyrr en eftir HM.    
    • Ragnhildur Skúladóttir kynnti doktorsverkefni við HÍ sem áður hefur verið rætt á stjórnarfundi.  Stjórn jákvæð gagnvart verkefninu en frestaði að ákveða styrkupphæð til haustsins, m.a. m.t.t. fjárhagsáætlunar.  Stjórn sammála um að ef styrkir fást í verkefnið frá UEFA eða FIFA verði það hluti af framlagi KSÍ.     
    • Valgeir Sigurðsson formaður útbreiðslunefndar kynnti tillögu útbreiðslunefndar  – Fyrsta markið mitt!  Samþykkt að skoða málið heildstætt í haust.  

      Fleira var ekki bókað og var fundi slitið kl. 19:45.