Advania verður bakhjarl KSÍ
Landsliðið í upplýsingatækni leggur Knattspyrnusambandi Íslands lið.Guðni Bergsson formaður Knattspyrnusambands Íslands og Ægir Már Þórisson forstjóri Advania undirrituðu í dag rafrænan samning um að Advania verði einn af sex bakhjörlum KSÍ næstu þrjú árin. Advania og KSÍ hafa átt náið samstarf í mörg ár og með bakhjarlasamningnum er stefnt að enn meiri samvinnu.
Advania hefur smíðað nýja heimasíðu fyrir KSÍ sem opnuð var á dögunum en þar hefur aðgengi að tölfræðiupplýsingum úr gagnagrunni KSÍ verið stórbætt. Advania hefur einnig smíðað öflugt mótakerfi með yfirliti yfir mótaupplýsingar allra fótboltaiðkenda í landinu og er aðgengilegt á vefnum.
Spennandi og annasamir tímar eru framundan hjá Knattspyrnusambandinu, meðal annars vegna þátttöku A-landsliðs karla á heimsmeistaramótinu í Rússlandi. Advania vill auðvelda úrlausn á þeim fjölmörgu flóknu tæknimálum sem Knattspyrnusambandið stendur frammi fyrir og gera því kleift að einbeita sér að sínu sérsviði, fótbolta. Landsliðið í upplýsingatækni ætlar veita sambandinu framúrskarandi þjónustu og sjá til þess að tæknimálin gangi vel.
„Við erum stolt af því að stíga af fullum þunga inn í verkefnin með Knattspyrnusambandinu og efla það með bættri upplýsingatækni. Það er sönn ánægja að geta stutt við starfsemi okkar færustu knattspyrnuiðkenda í karla- og kvennalandsliðunum. Ekki síst fögnum við því að stuðningurinn nýtist til að efla grasrótarstarfið sem unnið er um allt land. Upplýsingatæknin verður sífellt mikilvægari í starfsemi aðildarfélaga KSÍ og við vonumst til að okkar stuðningur auðveldi þeim verkin,“ segir Ægir Már Þórisson forstjóri Advania.
„Við höfum átt farsælt samstarf við Advania í gegnum tíðina og erum ánægð með að geta styrkt samstarfið enn frekar. Fótboltinn kallar á sífellt meiri upplýsingatækni, í þjálfun, mótahaldi og umstangi við ferðalög iðkenda. Það er ómetanlegt að hafa aðgengi að öflugu fagfólki í þessum efnum,“ segir Guðni Bergsson formaður Knattspyrnusambands Íslands.