Katar - Ísland í Doha á þriðjudag
A landslið karla er um þessar mundir statt í æfingabúðum í Katar og hefur þegar leikið einn vináttuleik, 1-2 tap gegn Tékkum á miðvikudag í síðustu viku. Seinni leikurinn í þessu verkefni, sem er fyrsti liður í undirbúningi liðsins fyrir þátttöku í úrslitakeppni HM 2018 í Rússlandi næsta sumar, er gegn heimamönnum í Katar, og fer leikurinn fram á þriðjudag í Doha.
Í fyrri leiknum fengu ýmsir leikmenn tækifæri sem höfðu ekki fengið margar mínútur í undankeppninni og má gera ráð fyrir því að svipað verði uppi á teningnum gegn Katar á þriðjudag. Þess má geta að Katar og Tékkland mættust í Doha á laugardag, þar sem Tékkar skoruðu eina mark leiksins.
Leikurinn verður í beinni útsendingu á Stöð 2 Sport og hefst kl. 16:30 að íslenskum tíma.
