A kvenna - Ísland mætir Tékklandi í dag
Ísland leikur þriðja leik sinn í undankeppni HM 2019 í dag þegar liðið mætir Tékklandi. Leikurinn fer fram ytra og hefst hann klukkan 16:00 að íslenskum tíma og verður sýndur í beinni útsendingu á RÚV.
Stelpurnar hafa farið frábærlega af stað í riðlinum og hafa þær sex stig eftir tvo leiki. 8-0 sigur vannst á Færeyjum og frábær 3-2 sigur gegn Þýskalandi ytra, en það var í fyrsta sinn sem Ísland vinnur Þýskaland.
Tékkland er einnig með sex stig, en þær hafa leikið þrjá leiki. Eina tap þeirra kom gegn Þýskalandi á heimavelli, 0-1. Tékkar hafa unnið Færeyjar 8-0 og Slóveníu 4-0, báða á útivelli.
Þetta er í þriðja sinn sem liðin mætast, en Tékkland hefur unnið báða leiki liðanna til þessa. Þeir leikir voru liður í undankeppni HM 2007. Ísland tapaði þar 1-0 ytra og 2-4 á Laugardalsvelli. Mörk Íslands í þeim leik skoruðu Ásthildur Helgadóttir og Margrét Lára Viðarsdóttir.
Það er því ljóst að hörkuleikur bíður Íslands í dag og geta þær tryggt stöðu sína á toppi riðilsins enn frekar með sigri.
Áfram Ísland!
