Gylfi Sigurðsson íþróttamaður ársins 2016
Gylfi Þór Sigurðsson var útnefndur Íþróttamaður ársins 2016 af Samtökum íþróttafréttamanna en kjörinu var lýst í Hörpu í Reykjavík. Í hófinu var einnig valið lið ársins og var það karlalandslið Íslands í fótbolta sem hlaut þá útnefningu.
Gylfi hlýtur viðurkenningun íþróttamaður ársins í annað skipti en hann varð einnig fyrir valinu árið 2013.
Gylfi átti afar gott ár með Swansea City í ensku úrvalsdeildinni. Hann átti stóran þátt í að bjarga liðinu frá falli með því að skora níu mörk frá áramótum og til vors. Það sem af er yfirstandandi tímabil hefur Gylfi verið yfirburðamaður í liði Swansea, er búinn að skora fimm mörk í deildinni og hefur átt þátt í stórum hluta annarra marka sem liðið hefur skorað.
Hann var ennfremur í lykilhlutverki með íslenska landsliðinu sem náði sínum besta árangri frá upphafi í sumar þegar það komst í átta liða úrslitin í Evrópukeppninni í Frakklandi. Gylfi lék þar alla fimm leikina frá upphafi til enda og skoraði eitt mark. Þá var hann í fararbroddi í leikjum haustsins í undankeppni heimsmeistaramótsins þar sem íslenska liðið er í toppbaráttu í sínum riðli.
Hrafnhildur Lúthersdóttir sundkona hafnaði í öðru sæti í kjörinu og kylfingurinn Ólafía Þórunn Kristinsdóttir varð í þriðja sæti.
Karlalandsliðið valið lið ársins
Karlalandsliðið í fótbolta var kjörið lið ársins 2016 af Samtökum íþróttafréttamanna en kjörið var tilkynnt í kvöld við hátíðlega athöfn í Silfurbergi í Hörpu.
Þetta er annað árið í röð og í þriðja sinn á síðustu fjórum árum sem karlalandsliðið í fótbolta er valið lið ársins.
Fótboltalandslið karla hafði betur í baráttu við kvennalandsliðið í fótbolta og karlalandsliðið í körfubolta sem voru einnig tilnefnd eftir að hafa lent í þremur efstu sætunum í kjöri meðlima Samtaka íþróttafréttamanna.
Íslenska landsliðið hefur aldrei átt betra ár en 2016. Liðið sló í gegn á heimsvísu á Evrópumótinu í Frakklandi í sumar en það var fyrsta stórmót karlalandsliðsins frá upphafi. Liðið endaði síðan árið í 21. sæti á heimslista FIFA og hefur aldrei verið ofar.
Íslensku strákarnir sendu Englendinga heim af EM í Frakklandi í júní og komust alla leið í átta liða úrslit keppninnar þar sem liðið varð að sætta sig við tap á móti gestgjöfum og verðandi silfurliði Frakka.
Íslenska liðið tapaði aðeins einum af fimm leikjum sínum í keppninni og skoraði alls átta mörk á mótinu. Það voru aðeins þrjú landslið á mótinu sem skoruðu fleiri mörk að meðaltali í leik eða Frakkland, Belgía og Wales.
Íslenska landsliðið hóf árið í 36. sæti á heimslista og hækkaði sig því um fimmtán sæti á árinu. Liðið endar árið langt fyrir ofan allar Norðurlandaþjóðirnar og jafnframt er Ísland ofar en Holland á FIFA-listanum.
Íslenska landsliðið setti líka nýtt met með því að spila alls sautján A-landsleiki á árinu, níu keppnisleiki og átta vináttulandsleiki. Gamla metið voru 13 leikir árið 1988. Miðvörðurinn Ragnar Sigurðsson spilaði flesta leiki á árinu eða 15 sem er einnig nýtt met.
.jpg?proc=760)
.jpg?proc=760)
