Ísland og Kína skildu jöfn á Sincere Cup
Kvennalandsliðið gerði 2-2 jafntefli við Kína í fyrsta leik Sincere Cup sem fram fer í Kína. Fanndís Friðriksdóttir og Katrín Ásbjörnsdóttir skoruðu mörk Íslands í leiknum en leikurinn var jafn og spennandi frá fyrstu mínútu.
Fyrsta mark leiksins kom á 6. mínútu en þá kom sending til Fanndísar Friðriksdóttur sem komst framhjá markmanni Kína og setti boltann í markið. Þrátt fyrir ágæt færi komu ekki fleiri mörk í fyrri hálfleik.
Á 53. mínútu jafnaði Kína metin þegar Wang Shuang skoraði fyrir Kína en kínverska liðið pressaði nokkuð stíft í seinni hálfleik.
Á 82. mínútu komst Kína yfir þegar Yang Li skoraði eftir laglega sókn kínverska liðsins. Það var svo á 86. mínútu að Ísland náði að jafna metin en Katrín Ásbjörnsdóttir skoraði þá eftir að Hólmfríður Magnúsdóttir kom boltanum á Katrínu. Lokatölur 2-2 í spennandi leik.
Í hinum leik dagsins á mótinu vann Danmörk 2-1 sigur á Úsbekistan en danska liðið skoraði sigurmarkið í uppbótartíma.
Ísland og Danmörk mætast á laugardaginn á mótinu og hefst leikurinn klukkan 11:35 að íslenskum tíma.
Viðtöl við Frey Alexandersson og Söru Björk Gunnarsdóttur má finna á YouTube-síðu KSÍ.
Myndir frá leiknum má sjá á Facebook-síðu KSÍ
.jpg?proc=760)
.jpg?proc=760)
