Farseðillinn nánast tryggður með sigri
Með sigri á Makedóníu í kvöld mun íslenska liðið verða á þröskuldi þess að vera öruggt í úrslitakeppnina í Hollandi 2017. Efsta þjóðin í hverjum riðli tryggir sér sæti í úrslitakeppninni ásamt þeim sex þjóðum sem eru með bestan árangur í öðru sæti í riðlunum átta. Þær tvær þjóðir sem eru þá eftir leika innbyrðis umspilsleiki um eitt sæti.
Þegar reiknað er út hvaða þjóðir eru með bestan árangur í öðru sæti eru bara teknir með í reikninginn leikir gegn þjóðunum í fyrsta, þriðja og fjórða sæti. Leikir gegn neðsta liðinu í riðlinum eru því ekki teknir inn í jöfnuna.
Ef Ísland nær að leggja Makedóníu í kvöld eru 18 stig í húsi og tveir leikir eftir. Því þarf að bíða eftir úrslitum leikja í öðrum riðlum til að endanlega sé hægt að staðfesta að farseðillinn til Hollands sé tryggður.
