Fimm breytingar á byrjunarliði A karla
A landslið karla leikur seinni vináttuleik sinn í æfingaferðinni til Sameinuðu arabísku furstadæmanna á laugardag. Fyrri leikurinn var 1-0 sigur á Finnum síðasta miðvikudag, en mótherjarnir á laugardag eru heimamenn. Leikið er á Al Maktoum leikvanginum í Dubai, leikurinn er í beinni útsendingu á RÚV og hefst hann kl. 14:15 að íslenskum tíma.
Fimm breytingar eru gerðar á byrjunarliði Íslands milli leikja. Fyrirliðinn Eiður Smári Guðjohnsen verður í framlínunni ásamt Viðari Erni Kjartanssyni, Arnór Ingvi Traustason og Elías Már Ómarsson verða á köntunum, Emil Pálsson og Rúnar Már Sigurjónsson á miðjunni, bakverðir eru Kristinn Jónsson og Andrés Már Jóhannesson, miðverðir eru Ragnar Sigurðsson og Kári Árnason, og í markinu stendur Ingvar Jónsson. Þeir Elías Már, Emil, Kristinn, Andrés Már og Kári koma inn í byrjunarliðið. Emil og Andrés Már hafa ekki áður tekið þátt í A landsleik.
.jpg?proc=760)
